नेपालगन्ज (हाम्रो खेलकुद)- खेलाडी र खेलकर्मीलाई सम्मान गर्न नेपालगन्जमा लुम्बिनी स्पोर्टस् अवार्ड हुने भएको छ ।

रंगशाला नेपाल मिडिया प्रालीले आयोजना गर्न लागेको लुम्बिनी स्पोर्टस् अवार्ड मंसिर १८ गते हुने बताइएको छ।
२०७३ मा स्थापना भएको रंगशाला नेपाल मिडिया प्रालीले सञ्चार र खेलकुदको क्षेत्रमा काम गर्दै आएको जनाइएको छ।

अवार्डमा लुम्बिनी प्रदेश अन्तर्गतका जिल्लाका खेलाडी, खेलकर्मीले प्राप्त गरेका उपलब्धि र सफलताका आधारमा अवार्ड प्रदान गरिने कार्यक्रम संयोजक चाहना शाह बताइन् ।

शाहले भनिन् ‘लुम्बिनी प्रदेश खेलकुदका क्षेत्रमा निकै सशक्त प्रदेश हो । तर यहाँ खेलाडी र खेलकर्मीको मनोबल बढाउनका लागि थोरै कार्यक्रम हुने गरेका छन् । हामीले खेलकुदमा आफनो जीवन समर्पण गरेका र खेलमा नयाँ सम्भावना देखेर मिहिनेत गरिरहेका खेलाडीको हौसला बढाउन पनि यो अवार्ड कार्यक्रम गर्ने तयारी गरेका हौं ।’

अवार्डमा उत्कृष्ट पुरुष खेलाडी अवार्ड, उत्कृष्ट महिला खेलाडी अवार्ड, विशेष अवार्ड र उत्कृष्ट टिम अवार्ड प्रदान गरिने रंगशाला नेपाल मिडिया प्रालिका प्रबन्ध निर्देशक कमल खत्रीले बताए । अवार्डसँगै पुरस्कृत हुनेलाई नगद र उपहार प्रदान गरिने बताइएको छ।

अवार्ड कार्यक्रमले लुम्बिनी प्रदेशका खेलाडीको हौसला बढाउँदैं उहाँहरुलाई राष्ट्रिय तथा अन्तराष्ट्रिय स्तरका प्रतियोगितामा सफलता हासिल गर्न प्रेरणा मिल्ने विश्वास लिएको खत्रीले बताए ।