काठमाडौं (हाम्रो खेलकुद)– जर्मनीको डस्सल जारी अन्तर्राष्ट्रिय टेबल टेनिस महासंघ (आइटिटिएफ) को साधारण सभामा बुधबार नेपाली टेबल टेनिसको चर्चा भएको छ ।

यसपटकको आइटिटिएफको प्रतिवेदनमा नेपालमा सञ्चालन भइरहेको युनाइटेड नेसन डेभलप्मेन्ट अफ स्पोर्टस परियोजना अन्तर्गत पारा टेबल टेनिसका बारेमा प्रकाशित गरिएको छ । हनुमान ढोकामा पारा एथलिटहरुको टेबल टेनिस खेलिरहेको तस्बिर प्रतिवेदनको मुख्य पृष्ठमा प्रकाशित गरिएको छ ।

सोही अवसरमा नेपालमा गरेको कामको उच्च मुल्याङन गर्दै युएनले आइटिटिएफलाई युनएन स्पोर्टस पिस अवार्ड प्रदान गरेको सभामा भाग लिइरहेको अखिल नेपाल टेबल टेनिस संघका अध्यक्ष चतुरानन्द राजवैद्यले हाम्रो खेलकुद डटकमलाई टेलिफोनमार्फत जानकारी दिए । ‘यो सभामा विश्वभरका ३ सय ६० जनाको सहभागिता छ,’ राजवैद्यले भने,‘यस्तोमा नेपालमा गरेको कामका आधारमा आइटिटिएफले अवार्ड पाउँदा गर्व लागेको छ । त्यसमा हाम्रो कामको पनि मुल्याङकन भएको ठानेको छु ।’
सोही अवसरमा आइटिटिएफका अध्यक्ष थोमस वेयकटले २०७२ बैशाख १२ गते नेपालमा गएको विनाशकारी भूकम्पपछि सुरु गरिएको परियोजनाको चर्चा गरेका थिए । १ लाख ५० हजार अमेरिकी डलरको उक्त परियोजना नेपालका ६ स्थानमा सञ्चालन भइरहेको छ ।

काठमाडौं, जोरपाटी, दाङ, पोखरा र विराटनगरका सय बढी पारा एथलिटलाई टेबल टेनिसको प्रशिक्षण दिइदै आएको छ । पारा एथलिटलाई टेबल टेनिस प्रशिक्षकका आत्मनिर्भर बनाउने योजना परियोजनाको रहेको छ । परियोजना अझै डेढ बर्ष बाँकी रहेको राजवैद्यले जानकारी दिए ।

आजै आइटिटिएफको नयाँ अध्यक्षका लागि समेत निर्वाचन सम्पन्न भएको उनले जानकारी दिए । डस्सलमा जारी च्याम्पियनसिपमा नेपाली ४ खेलाडीले पनि भाग लिइरहेका छन् ।