काठमाडौं (हाम्रो खेलकुद) – एसियन जुनियर बक्सिङ च्याम्पियनसिपका लागि नेपाली युवा बक्सर ओम परियार फिलिपिन्स जाने भएका छन् । एसियन जुनियर बक्सिङ च्याम्पियनसिप फिलिपिन्सको पुर्तो प्रिन्सेसा शहरमा अगस्ट १ देखि ८ तारिखसम्म सञ्चालन हुदैछ ।
नेपाली बक्सिङ टोली शुक्रवार त्यसतर्फ प्रस्तान गदैछ । एसियन बक्सिङ फेडेरेसनको वार्षिक क्यालेन्डर अनुसार आयोजना भएको च्याम्पियनसिपमा ओमले ४९ केजी तौल समूहमा नेपालको चुनौती प्रस्तुत गर्नेछन् । नेपाली टोलीको नेतृत्व नेपाल बक्सिङ संघका सदस्य ओमनारायण श्रेष्ठले गर्नेछन् । यसैगरी प्रशिक्षकको भूमिका भने काजकिस्तानका बक्सिङ प्रशिक्षक मुख्तार बर्दिमतोभले निर्वाह गर्नेछन् ।
नेपाली टोलीलाई बिहीबार सातदोबाटोमा राष्ट्रिय खेलकुद परिषद् (राखेप)का सदस्य–सचिव केशवकुमार बिष्टले विदाई गरे । विगत तीन महिनादेखि विभिन्न विद्यालयमा बक्सिङ प्रशिक्षण सुरु गरेको नेपाल बक्सिङ संघले अन्तर्राष्ट्रिय प्रतियोगितामा युवा बक्सरको सहभागिताले नयाँ खेलाडीलाई प्रोत्साहित गर्ने विश्वास लिएको छ ।
