काठमाडौं (हाम्रो खेलकुद) – दक्षिण एसियाली राष्ट्रहरुबीचको सबैभन्दा प्रतिष्ठित फुटबल प्रतियोगिता (साफ च्याम्पियनसिप) को १२औं संस्करण यसपटक बंगलादेशमा शुरु हुदैछ ।

प्रतियोगिता शुरु हुन अब मात्रै चार दिन बाँकी छ । साफ सुजुकी कप नजिकदिदै गर्दा सहभागी सबै सात राष्ट्रले आफ्नो तयारीलाई तीब्रता दिएका छन् । अहिले सम्म सेमिफाइलभन्दा अघि बढ्न नसकेको नेपालले यसपटक फाइनल पुग्ने लक्ष्य बनाएको छ ।
नेपाल टोलीले इन्डोनेसियामा जारी एसियाली खेलकुद र साफ च्याम्पियनसिपको लागि तीन महिना अघिबाटै प्रशिक्षण सुरु गरेको थियो । यू–२३ टोली एसियाडमा तीन खेल गुमाएर फर्के लगत्तै प्रशिक्षणलाई निरन्तरता दिएका छन् । टिमलाई कार्यवहाक मुख्य प्रशिक्षक बालगोपाल महर्जन सहायक प्रशिक्षक किरण श्रेष्ठ र नवीन महर्जनले प्रशिक्षण दिइरहेका छन् ।
सन् १९९३ मा सार्क गोल्डकपका नामले शुरु भएको यो प्रतियोगिता १९९७ मा नेपालमा आयोजना भएपछि साफ च्याम्पियनसिप बन्न पुगेको थियो । त्यसयता यो प्रतियोगिता सार्क कोकाकोला गोल्डकप हुदै साफ सुजुकी कपको नामले पनि चिनिन्छ ।

तेस्रो साफ गोल्डकपमा नेपालको प्रर्दशन

तेस्रो संस्करणको साफ गोल्डकप नेपालले आयोजना गर्ने अधिकार पाएको थियो । ६ राष्ट्र सहभागी प्रतियागिता काठमाडौंमा ४ देखि १३ सेप्टेम्वरसम्म दशरथ रंगशालामा आयोजना भएको थियो ।
घरमै आयोजना भएको साफ गोल्डकपमा नेपालको प्रदर्शन निकै कमजोर बन्यो । समूह ‘ए’ रहेको नेपाल दुई हारसहित पुछारमा रह्यो । ४ सेप्टेम्वरमा नेपाल पाकिस्तानसँग २–० ले तथा ८ सेप्टेम्वरमा श्रीलंकासँग ३–१ ले पराजित हुन पुग्यो । नेपालका लागि एकमात्र गोल दीपक अमात्यले गरेका थिए । उनले अघिल्लो साफमा पनि गोल गरेका थिए ।
यो संस्करणमा भारत च्याम्पियन बन्न सफल भयो । समुह चरणमा २–२ गोलको बराबरी खेलेपनि भारतले फाइनलमा मल्दिभ्सलाई ५–१ को फराकिलो अन्तरले पराजित गर्दै दोस्रोपटक साफ गोल्डकप जित्न सफल भयो । पहिलो संस्करण जितेको भारत दोस्रो संस्करणको फाइनलमा श्रीलंकासँग पराजित भएको थियो ।

चौथो साफ गोल्डकपमा नेपालको प्रदर्शन

दक्षिण एसियाली फुटबलमा आफुलाई शक्तिशाली टोलीको रुपमा उभ्याएको भारतले चौथो साफ गोल्डकप आयोजना गर्दै तेस्रोपटक साफ गोल्डकप जित्न सफल भयो ।

गोल्डकप भारतको गोवामा अप्रिल २२ देखि १ मे सम्म भएको थियो । नेपालले यो संस्करणमा निकै राम्रो फुटबल खेल पस्केको थियो ।
समूह ‘बी’ रहेको नेपालले समुह चरणको पहिलो खेलमा नरेश जोशीको ह्याट्रिक मद्दतमा श्रीलंकालाई ३–२ ल पराजित गर्दै सुखद शुरुवात गरेको थियो । चौथो मिनेटमा नरेश जोशीको गोलबाट अग्रता लिएको नेपाल २४औं मिनेटमा २–१ ले पछि परेको थियो । तर, त्यसपछि नरेशले उच्च प्रदर्शन गर्दै थप दुई गोल गरेपछि नेपाल ३–२ ले विजयी हुन सफल भएको थियो ।

माल्दिभ्सविरुद्धको खेलमा भने नेपाल ३–२ ले नै पराजित हुन पुग्यो । यो खेलमा नेपालका लागि हरि खड्काले दुई गोल गर्न सफल भएका थिए । पराजित भएपनि नेपाल समूह उपविजेताको रुपमा सेमिफाइनलमा पुग्न सफल भएको थियो । सेमिफाइनलमा नेपाल बंगलादेशसँग २–१ ले पराजित भयो ।

२–० ले पछि परेको अवस्थामा बालगोपाल महर्जनले एक गोल गर्दै नेपालको आशा जगाएको थियो । तर, त्यसपछि नेपालले गोल फर्काउन नसक्दा सेमिफाइनलमा रोकियो । तेस्रो स्थानको लागि भएको खेलमा नेपाल मालिदभ्ससँग २–० ले पराजित हुन पुग्यो ।
भारतले फाइनलमा बंगलादेशलाई २–० ले पराजित गर्दै तेस्रोपटक साफ गोल्डकप जित्न सफल भयो । समान ३ गोल गरेका नरेश जोशी र भाइचुङ भुटिया संयुक्त रुपमा गोल्डकपको सर्वाधिक गोलकर्ता भए ।