काठमाडौं, चैत ६
ललितपुर जिल्ला बक्सिङ संघले भारतमा भएको १२ औं दक्षिण एसियाली खेलकुद (साग) अन्तर्गत बक्सिङका कांस्यपदक विजेता तीन खेलाडीलाई शनिबार नगदसहित सम्मान गरेको छ ।
भारतको सिलोङमा भएको बक्सिङमा पुरुषमा दीपक श्रेष्ठ तथा महिलामा मीनु गुरुङ र सरस्वती रानाले कांस्य जितेका थिए । विजेतात्रय समान १५ हजार नगदसहित प्रशंसा पत्रबाट सम्मानित भए । त्यस्तै नेपालमै भएको आठौं साफका स्वर्ण विजेता दाजुभाई प्रकाश थापामगर र रामचन्द्रलाई नगद ५–५ हजार र प्रशंसा पत्रद्वारा सम्मान गरियो । प्रकाश सागमा गएका बक्सिङ प्रशिक्षक टोलीका सदस्य पनि हुन् ।
उनीहरुलाई युवा तथा खेलकुद मन्त्री सत्यनारायण मण्डल, राष्ट्रिय खेलकुद परिषद्का उपाध्यक्ष लामा टेन्डी शेर्पा र सदस्य–सचिव केशवकुमार विष्ट, नेपाल ओलम्पिक कमिटीका अध्यक्ष जीवनराम श्रेष्ठ, ललितपुर जिल्ला बक्सिङ संघका अध्यक्ष राम अवालेलगायतले सम्मान गरे ।
