पोखरा (हाम्रो खेलकुद) – विभागीय त्रिभुवन आर्मी क्लबका हरि कुमार रिमालले सफल पोखरा म्याराथनको जित्न सफल भएको छ ।

आर्मीका हरिले एपीएफका खिम बहादुर खत्रीलाई १० सेकेण्डले पछि पार्दै उपाधि जित्न सफल भएको हो । पोखरा रंगशालामा मंगलबार भएको म्याराथनमा हरिले निर्धारित ४२.१९५ किलोमिटर दुरी २ घण्टा ४० मिनेट १० सेकेण्डमा पार गरे । दोस्रो भएका एपीएफका खिम बहादुर खत्रीले २ घण्टा ४० मिनेट २० सेकेन्डमा दुरी पुरा गरे । नेपाल पुलिस क्लबका भुमिराज राईले २ घण्टा ४१ मिनेट १७ सेकेन्डमा दुरी पार गर्दा आर्मीका पूर्ण लामाले २ घन्टा ४२ मिनेट ५५ सेकेन्डमा पार गर्दै चौथो स्थान हात पारे ।

उपाधिसँगै हरिले १ लाख रूपैयह हात पारे । खीमबहादुरले ७० हजार, तेस्रो भुमिराज राइले ५० हजार तथा चौथो भएका पुर्णले १० हजार रूपैया हात पारे । म्याराथनमा ६० जना धावकले प्रतिस्पर्धा गरेका थिए ।

१० किलोमिटर पुरुषतर्फ आर्मीले वर्चस्व जमायो । विकास कार्की पहिलो, राजन रोकाया दोस्रो तथा शिवबहादुर रायमाझीले तेस्रो स्थान हात पारे । महिलातर्फ पुलिसकी राजपुरा पचहाई पहिलो, एपिएफकी विन्द्रा श्रेष्ठ दोश्रो र आर्मीकी सरिता वासीले तेस्रो स्थान हात पारिन् । महिला पुरुष दुवैतर्फको विजेताले समान १५ हजार रूपैया हात पारे । दोस्रो र तेस्रोले क्रमश १० र ५ हजार रूपैया पाए ।

५ किलोमिटर दौडको पुरुषतर्फ अजय तामाङ, विनोद गुरुङ र तुलबहादुर घर्तीमगरले क्रमशः पहिलो, दोस्रो र तेश्रो स्थान हात पारे । महिलातर्फ ललिता लामिछाने पहिलो र नानु हमालले दोस्रो स्थान हात पारिन् । उनीहरुले क्रमशः १० हजार, ७ हजार र ५ हजार रूपैया पाए ।

ह्विलचियरतर्फ सुरेश गौली, भरत अधिकारी र हेमबहादुर गुरुङ तथा महिलामा लक्ष्मी विश्वकर्मा, अञ्जु बसेल र पवित्रा विकले क्रमशः पहिलो, दोश्रो र तेश्रो स्थान हात पारे । उनीहरुले ५ हजार, ३ हजार र २ हजार रुपैया हात पारे ।

दृष्टिविहिन महिलातर्फ वि टु विधामा विनिता पुन र बी वानमा रितादेवी थापा तथा पुरुषतर्फ वि टुमा आदेश बस्याल र बी वानमा दुर्गादत्त पौडेल पहिलो भए । विजयी खेलाडीहरुलाई भुतपुर्व खेलाडी मञ्चका अध्यक्षलगायत विशिष्ट व्यक्तित्वहरुले पुरस्कृत गरेका थिए ।

म्याराथनमा करिव ५ हजार धावकले सहभागिता जनाएको आयोजकले जनाएको छ । भुतपुर्व खेलाडी मञ्च पोखराले प्रजातन्त्र दिवसको अवसरमा प्रतियोगिता आयोजना गरेको हो ।