काठमाठौं (हाम्रो खेलकुद) – दि फिजिक्स वर्कसपकी ओलिभा महर्जन र जिमखाना मुवाँ थाइकी विपाशी तुलाधार चौथो अन्तर क्लब स्क्वाट च्याम्पियनसिपमा पहिलो भएकी छन् । ओलिभा ६० केजी तौलसमूह मुनि र विपाशी ६० केजी तौल समूह भन्दा माथि च्याम्पियन बनेकी हुन् ।
आइडिया सप मिडिया एन्ड इन्टरटेनमेन्ट र जस्मिन फिटनेसले अन्तर्राष्ट्रिय नारी दिवसको अवसर पारेर आयोजना गरेको च्याम्पियनसिपमा च्याम्पियन बन्ने क्रममा ओलिभाले १२५ केजी भार उचालिन् । ११५ केजी भार उचालेकी रेज फिटनेसकी अरुणा बस्नेत दोस्रो तथा रानीपौवा स्पोर्ट्स क्लबका ज्योति थापाले १०० केजी भार उचाल्दै तेस्रो स्थान हात पारिन् ।
६० केजी तौलभन्दा माथि जिमखाना मुवाँ थाईकी विपाशी तुलाधर १५० केजी तौल उचाल्दै च्याम्पियन बनिन् । दि वर्कआउट स्टेसन क्लबकी उमा महर्जनले १४० केजी तौल उचाल्दै दोस्रो तथा नेपाल व्यायाम मन्दिर क्लबकी विद्या राई १४० केजी तौल उचाल्दै तेस्रो स्थान हात पारिन् ।
दुई दिनसम्म भएको च्याम्पियनसिपमा पहिलो चरणको प्रतिस्पर्धा ज्यासमिन फिटनेस सेन्टर, त्रिपुरेश्वर र दोश्रो चरणको कार्यक्रम लाबिम मल, पुल्चोकमा भएको थियो । जसमा २२० जना प्रतिस्पर्धीहरुबाट ३१ प्रतिस्पर्धीहरु अन्तिम चरणको लागि छनोट भएका थिए ।
दुवै तौल समुहको विजेताले समान ५० हजार रूपैया हात पारे । दोस्रो भएकाले ३० हजार तथा तेस्रो भएकोले समान २० हजार रुपैया पाए । विजयी खेलाडीहरुलाई ललितपुर महानगरपालिकाका मेयर चिरीबाबु महर्जनले पुरस्कृत गरे ।
