लमजुङ (हाम्रो खेलकुद) – ‘राइनासकोट पर्यटन कप’ फुटबल प्रतियोगिताको उपाधि वडा नम्वर ६ धमिलीकुवा स्याउलीले जितेको छ ।
राइनासकोट ग्रामीण पर्यटन तथा होमस्टे व्यवस्थापन समितिको आयोजनामा गण्डकी प्रदेशको पर्यटकीय नगरी लमजुङस्थित राइनास नगरपालिकाको वडा नम्वर ९ मा आइतबार भएको फाइनल खेलमा धमिलीकुवाले वडा नम्वर १० कोकेगाँउलाई सडनडेथमा ६–५ ले पराजित गर्दै च्याम्पियन बनेको हो ।
निर्धारित र थप गरिएको समयमा कुनै गोल निस्कन नसकेपछि खेल पेनाल्टी सुटआउटमा पुगेको थियो । धमिलीकुवाका चन्द्र रानामगर, उत्तम थापामगर, बादल तामाङ, सागर गुरुङ, प्रवेश पाण्डे र मान बहादुर तामाङले गोल गरे । कोकेगाँउका देव गुरुङ, सरन गुरुङ, कुशल गुरुङ, चन्द्र गुरुङ र प्रेमराज गुरुङले गोल गरे ।
च्याम्पियन बनेसँगै स्याउली धमिलीकुवाले १ लाख रुपैया हात पा¥यो । दोस्रो स्थानमा चिक्त बुझाएको कोकेगाँउले ५० हजार पायो । कोकेगाँउका सरन गुरुङ प्रतियोगिताको सर्वाेत्कृष्ट खेलाडी घोषित भए । उनले नगदसहित मेडल र ट्रफी पाए ।
विजयी खेलाडीलाई वडा नम्वर ९ का वडा अध्यक्ष देव बहादुरथापा, वडा नम्वर ६ का वडा अध्यक्ष रुघ बहादुर तामाङ, प्रतियोगिता संयोजक तथा राइनासकोट ग्रामीण पर्यटन तथा होमस्टे व्यवस्थापन समितिका अध्यक्ष खड्ग बहादुर गुरुङलगायतले पुरस्कृत गरे ।
शिवरात्रीको अवसरमा गत फागुन २० गतेबाट सुरु भएको प्रतियोगितामा राइनास नगरपालिका भित्रका विभिन्न २० टोलीले नकआउटका आधारमा प्रतिस्पर्धा गरेको थियो ।
प्रतियोगिताको लागि राइनास नगरपालिकाबाट २ लाख रुपैया सहयोग गरेको र बाँकी अपुग रकम स्थानिय र चन्दाबाट संकलन गरेर पुर्ति गरिएको प्रतियोगिता संयोजक गुरुङले बताए ।
