काठमाडौं (हाम्रो खेलकुद)– प्रदेश ५ मा आयोजना गर्ने भनिएको आठौं राष्ट्रिय खेलकुदको उद्घाटन चैत २५ गते गर्ने गरि राष्ट्रिय खेलकुद परिषद् (राखेप) ले तयारी थालेको छ ।
राष्ट्रिय खेलकुदको कार्यकारी समितिको बैठकले चैत २५ गते औपचारिक सुरु गर्ने र ३० गते समापन गर्ने गरि राखेपबोर्डलाई सिफारिस गर्ने निर्णय गरेको छ । कार्यकारी समितिको सिफारिसलाई अनुमोदन गर्न राखेप बोर्ड बैठक चैतको पहिलो साता बस्ने बताइएको छ ।
राखेप सदस्य सचिव केशवकुमार विष्टको अध्यक्षतामा बसेको बैठकले चैत १९ गतेबाट केहि खेल सुरु गर्ने, २५ गते उद्घाटन र ३० गते समापन गर्ने गरि सिफारिस गरिएको राखेपका प्रेस सल्लाहकार रोहित दाहालले जानकारी दिएका छन् ।
आठौं राष्ट्रिय खेलकुदको उद्घाटन र समापन गर्ने नेपालगन्ज रंगशालाको भिआइपी प्यारापिटतर्फको सामान अझै आइनसकेकोले पनि राखेपले यसअघि उद्घाटनको मिति तय गर्न नसकेको बताइएको थियो ।
यसअघि माघमा आयोजना गर्ने भनिएको आठौं राष्ट्रिय खेलकुद भौतिक पूर्वाधार निर्माण सम्पन्न नभएपछि सार्नुपरेको थियो । यद्दपी राखेपले त्यसको आधिकारिक जानकारी भने गराएन ।
