काठमाडौं (हाम्रो खेलकुद) – होली पर्वको अवसरमा नुवाकोटको दुप्चेश्वरमा दोस्रो दुप्चेश्वर खुल्ला पुरुष भलिबल प्रतियोगिता यही बुधबारदेखि हुने भएको छ ।
आयोजक दुप्चेश्वर गाउँपालिका समुन्द्रटार र सोसियल सर्भिस युथ क्लबको संयुक्त आयोजना तथा कल्याण माध्यमिक विद्यालय दुप्चेश्वरको सहयोगमा दोस्रो संस्करणको प्रतियोगिता यही चैत ६ गतेदेखि ९ गतेसम्म हुने प्रतियोगिता संयोजक विक्रम थापाले जानकारी गराए ।
कल्याण माध्यमिक विद्यालय बालकुमारी नुवाकोटको कोर्टमा हुने प्रतियोगितामा अहिलेसम्म ८ टोलीको टुंगा लागिसकेको संयोजक थापाले बताए । उनका अनुसार खेल लिग कम नकआउटका आधारमा सञ्चालन हुनेछ ।
आठौं राष्ट्रिय खेलकुदका कारण विभागीय टोलीको सहभागिता नहुने भएपनि विभागका खेलाडीहरुहरु प्रतियोगिता खेल्ने सम्वन्धमा कुराकानी भैरेहका कारण खेल्ने सम्भावना बढी रहेको उनले बताए ।
प्रतियोगिताको विजेताले १ लाख २५ हजार नगद पुरस्कार पाउनेछन् । त्यस्तै उपविजेताले ७५ हजार, तेस्रो हुनेले ५० हजार र सान्त्वनाले २५ हजार पुरस्कार पाउनेछन् । यस्तै उत्कृष्ट खेलाडीले ५ हजार पाउनेछन् । व्यक्तिगत विधातर्फ स्पाइकर, सेटर, डिफेन्डर र सर्भरले जनही ३–३ हजार रुपैया पाउने आयोजकले जनाएको छ ।
प्रतियोगितामा सहभागी खेलाडीहरुलाई खाना र बासको व्यवस्था आयोजकले गर्ने दुप्चेश्वर गाउँपालिका समुन्द्रटारले जनाएको छ ।प्रतियोगिताको उद्घाटन माननीय सांसद हित बहादुर तामाङले गर्नेछन् । विशेष अतिथिमा प्रदेश ३ को उपसभामुख राधिका तामाङ रहने छन् । यस्तै प्रतियोगितालाई विजय कुमार तामाङ मुख्य प्रयोजन गर्न लागेको संयोजक थापाले बताए ।
प्रतियोगिताको पहिलो संस्करणमा स्याङ्जा जिल्ला भलिबल संघ च्याम्पियन बनेको थियो ।
