काठमाडौं (हाम्रो खेलकुद) – ज्ञान निकेतन र जेभियर स्कुलले प्रथम ह्वाइट हाउस इन्टर कलेज यु–१८ बास्केटबल प्रतियोगितामा विजयी सुरुवात गरेका छन् ।
ह्वाइट हाउस कलेजको कोर्टमा सोमबार भएको पहिलो खेलमा ज्ञान निकेतनले आयोजकलाई ४३–३७ को झिनो अन्तरले पराजित गर्दै विजयी सुरुवात गरेको हो । ज्ञान निकेतनको जितमा मनिष तामाङले सर्वाधिक १४ अंकको योगदान दिए ।
सोमबारै भएको अर्काे खेलमा तेन्जिङ सोनामको १४ अंकको सहयोगमा जेभियरले ट्रिटनमाथि ५०–२९ को फराकिलो जित निकाल्यो ।
यस्तै ट्रिनिटीले इनसाइड भिजनमाथि ३९–३५ को जित निकाल्दा किरण कणेलले १६ अंकको योगदान दिए ।
टाइम्सले गोलडेनगेटलाई ४४–३७ ले हरायो । टाइम्सको जितमा सुजन लिम्बुले २० अंकको योगदान दिए ।
कुल ८ टिमको सहभागिता रहेको लिग कम नकआउट प्रतियोगितामा राजधानीका ८ कलेजहरुको सहभागिता रहनेछ । प्रतियोगितामा ९ कक्षा देखि प्लस टुसम्म अध्ययनरत १८ बर्ष भन्दा मुनिका खेलाडीहरुको मात्र सहभागिता रहनेछ ।
प्रतियोगिताको समुह क मा आयोजक ह्वाइट हाउस, ज्ञान निकेतन, इन्साइट भिजन र ट्रिनिटी इन्टरनेशनल कलेज रहेका छन् । अर्को समुहमा टाइम्स इन्टरनेशनल कलेज, गोल्डेन गेट, ट्रिटन र जेभियर इन्टरनेशनल कलेज रहेका छन् । लिग चरणमा पहिलो दुई स्थान हात पार्ने टिमहरु सेमिफाइनलमा प्रवेश गर्नेछन्
।
