काठमाडौं (हाम्रो खेलकुद) – होली पर्वको अवसरमा नुवाकोटको दुप्चेश्वरमा दोस्रो दुप्चेश्वर खुल्ला पुरुष भलिबल प्रतियोगिता बुधबारदेखि शुरु भएको छ ।
प्रतियोगिताको पहिलो दिन आयोजक दुप्चेश्वर गाउँपालिका समुन्द्रटार पञ्चकन्या विजयी सुरुवात गरेका छन् ।
उद्घाटन खेलमा आयोजक दुप्चेश्वरले लाली गुरास ‘बी’ लाई २–० को सोझो सेटमा हरायो । वेस्ट अफ थ्रीको आधारमा भएको खेलमा पहिलो सेट दुप्चेश्वरले २५–१८ र दोस्रो सेट २५–१७ ले सहजै आफ्नो बनायो । अर्काे खेलमा पञ्चकन्याले कल्याण माध्यमिक विद्यालयलाई २५–१९ र २५–२३ ले हरायो ।
दुप्चेश्वर गाउँपालिका र सोसियल सर्भिस युथ क्लबको संयुक्त आयोजना तथा कल्याण माध्यमिक विद्यालय दुप्चेश्वरको सहयोगमा भएको दोस्रो संस्करणको प्रतियोगितामा ९ टोलीको सहभागिता रहेको छ । सहभागी ९ टोलीलाई चार समूहमा विभाजन गरिएको छ । हरेक समूहका शीर्ष दुई टोलीले सेमिफाइनलमा स्थन बनाउने छ ।
प्रतियोगिता ९ चैतसम्म हुने प्रतियोगिता संयोजक विक्रम थापाले जानकारी गराए ।
प्रतियोगिताको विजेताले १ लाख २५ हजार नगद पुरस्कार पाउनेछन् । त्यस्तै उपविजेताले ७५ हजार, तेस्रो हुनेले ५० हजार र सान्त्वनाले २५ हजार पुरस्कार पाउनेछन् । यस्तै उत्कृष्ट खेलाडीले ५ हजार पाउनेछन् । व्यक्तिगत विधातर्फ स्पाइकर, सेटर, डिफेन्डर र सर्भरले जनही ३–३ हजार रुपैया पाउने आयोजकले जनाएको छ ।
प्रतियोगिताको माननीय सांसद हित बहादुर तामाङ र प्रदेश ३ को उपसभामुख राधिका तामाङले रेफ्रीलाई बल हस्तान्तरण गर्दै उद्घाटन गरे ।
प्रतियोगिताको पहिलो संस्करणमा स्याङ्जा जिल्ला भलिबल संघ च्याम्पियन बनेको थियो ।
