काठमाडौं (हाम्रो खेलकुद) – विभागीय त्रिभुवन आर्मी क्लबका सोमबहादुर कुमाल र नेपाल एपीएफ क्लबका अजित कुमार यादवले कतारको दोहामा आयोजना हुने एशियन एथलेटिक्स च्याम्पियनसिपमा प्रतिस्पर्धा गर्ने भएका छन् ।
नेपाल एथ्लेटिक्स संघले दोहामा अप्रिल २१ देखि २४ तारिखसम्म आयोजना हुने च्याम्पियनसिपका लागि नेपालबाट सोमबहादुर कुमाल र अजित कुमार यादवले प्रतिस्पर्धा गर्ने जनाएको छ ।
संघका अनुसार गत महिना हङकङमा भएको तेश्रो एसियाली युथ एथलेटिक्स च्याम्पियनसिपका स्वर्णधारी अजितले ५ हजार मिटर दौडमा नेपालको चुनौती पेश गर्नेछन् । यस्तै कीर्तिमानी खेलाडी सोमबहादुर कुमालले ८ सय र १५ सय मिटर दौडमा प्रतिस्पर्धा गर्नेछन् ।
कुमालले गत भदौमा इन्डोनेसियामा भएको १८ औं एसियाली खेलकुदमा सोमबहादुर कुमालले १ मिनेट ५०.२५ सेकेन्डमा ८ सय मिटर दौड पूरा गर्दै आफ्ना गुरु धनीराम चौधरीको कीर्तिमान भंग गरेका थिए ।
नेपाली टोली २० अप्रिलमा कतार जाने कार्यक्रम रहेको छ ।
