काठमाडौं (हाम्रो खेलकुद) – नेपाली एथलेटिक्समा ४५ वर्षपछि ऐतिहासिक स्वर्णपदक दिलाएका युवा खेलाडी अजित कुमार यादवलाई नेपाल एथलेटिक्स संघले शुक्रबार पुर्वघोषित पुरस्कारले सम्मानित गरेको छ ।

संघले राजधानीमा एक कार्यक्रममा बीच स्वर्ण धारी अजितललाई टिभीएस मोटरसाइकल प्रदान गरेको हो । यस्तै उनका प्रशिक्षक धनीराम चौधरीलाई पनि संघले १ लाख रुपैयाँसहित सम्मानित गरेको छ । संघले झन्डै ६ महिनापछि अजित र उनका प्रशिक्षक धनीराम चौधरीलाई पुर्वघोषित पुरस्कारले सम्मानित गरेको हो ।

सोही अवसरमा संघले राखेपमा नवनियुक्त सदस्यसचिव रमेश कुमार सिलवालाई पनि स्वाग गरेका थिए ।

स्वर्ण विजेता अजितलाई युवा तथा खेलकुद मन्त्री जगत विश्वकर्मा सुनार, राखेपका सदस्यसचिव रमेश कुमार सिलवाल, उपाध्यक्ष पिताम्वर तिम्सिना र संघका अध्यक्ष राजीवविक्रम शाहलगायतले मोटरसाइकलको चावी हस्तान्तरण गरे ।

अजितलाई सम्मान तथा बधाई ज्ञापन गर्दै मन्त्री जगत बहादुर सुनारले एथलेटिक्स नेपालको पुरानो खेल रहेको र पछिल्लो समय संघ विवादित अवस्थामा रहेकोमा मिलेर जान सुझाव दिए ।
यस्तै राखेप सदस्यसचिव रमेश कुमार सिलवालले अजितले सधै जित्ने मेन्टालिटी नछोड्न आग्रह गर्दै १३औं सागमा पनि पदकको अपेक्षा गरिएको बताए । उपाध्यक्ष पिताम्वर तिम्सिनाले पनि अजितलाई बधाई ज्ञापन गरे । संघका अध्यक्ष राजीवविक्रम शाहले संघमा केही विवाद रहेको र विस्तारै सुल्झदै गएको बताए ।

अजितले गत चैतमा हङकङमा भएको तेश्रो एसियाली युथ एथलेटिक्स च्याम्पियनसिपमा नेपाललाई ऐतिहासक स्वर्ण दिलाएका थिए । घरेलु प्रतियोगितामा नेपाल एपीएफ क्लबबाट खेल्ने उनले पुरुष ३ हजार मिटर दौडमा स्वर्ण हात पारेका थिए । यो स्पर्धामा अजितसहित १२ राष्ट्रका १५ खेलाडीले प्रतिस्पर्धा गरेका थिए ।

राजविराजका १७ वर्षाीय अजितले निर्धारित दुरी ८ मिनेट ३० दशमलव ३२ सेकेन्डमा पूरा गरे । उनले भारतका अमित जान्गिरलाई ६ सेकेण्डले पछि पारे । अजितले आफ्नै नाममा रहेको जुनियर राष्ट्रिय कीर्तिमान पनि सुधार गरेका थिए । यसैवर्ष राष्ट्रिय खेलकुद परिषद्ले आयोजना गरेको केन्द्रीय विद्यालयस्तरीय राष्ट्रपति रनिङ सिल्डमा अजितले ८ मिनेट ४४ दशमलव ९ सेकेन्डको जुनियर राष्ट्रिय कीर्तिमान बनाएका थिए । सिनियर भने यो कीर्तिमान ज्ञानबहादुर बोहराको नाममा छ । उनले १९९९ मा भारतको नयाँ दिल्लीमा भएको एथलेटिक्स च्याम्पियनसिपमा ८ मिनेट २३ दशमलव ५९ सेकेन्डको कीर्तिमान रचेका थिए ।

अन्तर्राष्ट्रिय एथलेटिक्स महासंघ (आईएएएफ) द्वारा मान्यता प्राप्त र एसियाली एथलेटिक्स महासंघले आयोजना गर्ने अफिसियल एसियाली च्याम्पियनसिपमा नेपाली खेलाडीले जितेको यो पहिलो स्वर्ण हो । समग्रमा भने यो दोश्रो पदक हो । ४५ वर्षअघि १९७३ फिलिपिन्सको मनिलामा भएको एसियाली ट्रयाक एन्ड फिल्ड च्याम्पियनसिपमा जितबहादुर केसीले म्याराथनमा कास्य जितेका थिए । त्यो कांस्य अन्तर्राष्ट्रिय प्रतियोगितामा नेपालले जितेको पहिलो पदक पनि हो ।