पेरिस, जेठ २३ (एजेन्सी)– झन्डै ५० बर्षयता लगातार टेनिसका ४ वटा ग्रान्डस्लाम उपाधि जित्ने नोभाक जोकोभिच पहिलो खेलाडी बनेका छन् । एन्डी मुरेलाई ३¬–६,६–१,६–२,६–४ ले हराउँदै जोकोभिचले फ्रेन्च ओपन जितेपनि यस्तो कीर्तिमान बनाउका हुन् । चौथो फाइनलमा जोकोभिचले पहिलो पटक फ्रेन्च ओपन जितेका हुन् । शीर्षवरियताका उनको ग्रान्डस्लाम उपाधिको संख्या अब १२ पुगेको छ ।
फ्रेन्च ओपन उपाधिका साथ नोभाक जोकोभिच ।
डन बजले सन् १९६२ र रोड लामाले १९६९ एकै बर्षमा चारवटा ग्रान्ड स्लाम उपाधि जितेका थिए । त्यसयता उनी पहिलो खेलाडी हुन् ।
पहिलो सेट जितेका मुरे त्यसपछि भने कमजोर रहे । गत बर्ष फ्रेन्च ओपनको फाइनल गुमाएयताका जोकोभिचले ग्रान्डस्लामका कुनै पनि खेल हारेका छैनन् । उनले त्यसयताका २८ खेल जितेका छन् । गत बर्ष विम्बल्डन र युएस ओपन जितेका उनले जनवरीमा अस्ट्रेलियन ओपन जितेका थिए ।
फ्रेन्च ओपन उपाधिका साथ नोभाक जोकोभिच ।
पहिलो पटक फ्रेन्च ओपन जितेका २९ बर्षे सर्बियन ६ पटक अस्ट्रेलियन ओपन, तीन पटक विम्बल्डन र दुई पटक युएस ओपन जितेका छन् । अब सर्वाधिक ग्रान्डस्लाम जित्ने तीन खेलाडीमात्र उनीभन्दा अगाडी छन् । रोजर फेडेररले १७, राफाल नाडाल र पिट साप्रासले समान १४ पटक ग्रान्डस्लाम जितेका छन् ।
जोकोभिचले मुरेलाई प्रतियोगिताभर उच्च प्रदर्शन गरेकामा बधाई दिदै भने ‘मलाई विश्वास छ कुनै ठूलो उपाधि तिमिले चाडै जित्ने छौं । ’ जोकोभिचले आफुलाई सधै साथ दिने परिवार, साथी र समर्थकलाई धन्यवाद दिए । उनले थपे ‘मेरो खेल जीवनको विशेष क्षण मध्येको यो एक हो । म सबैलाई धन्यवाद दिन चाहन्छु जसले मलाई साथ दिइरहेका छन् ।’
हारले निराश बनाउको जनाउँदै मुरेले भने ‘मैले चाहेको नतिजा हो होइन, तर जोकोभिचले निकै राम्रो खेले ।’
हारपछि एन्डी मुरे ।
