नेपाल इन्टरनेश्नल तेक्वान्दो(आईटिएफ) ले अठारौं बर्ष गठको अवसरमा महिलातर्फ सन्तोषी दाहाल र पुरुषतर्फ पुर्णवहादुर मगरलाई बर्ष खेलाडीको उपाधिले शुक्रवार सम्मान गरेको छ ।
एपीएफकी सन्तोषीले गत बर्ष राष्ट्रिय प्रतियोगितामा २ स्वर्ण जित्दा १ पटक उत्कृष्ट खेलाडी बनेकी थिईन् । त्यस्तै मोरङका पुर्णले ३ स्वर्ण हात पार्दा १ पटक उत्कृष्ट खेलाडीको उपाधि जितेका थिए ।
लैनचौर स्थित टेबलटेनिस प्रशिक्षण केन्द्रमा भएको अवार्ड कार्यक्रममा बर्ष उत्कृष्ट प्रशिक्षकको उपाधि एपीएफका विश्व श्रेष्ठले हात पारे । तीनै जनाले नगद ५ हजार सहित सम्मान–पत्र प्राप्त गरे । त्यसैगरि प्रशिक्षण संचालन गर्ने उत्कृष्ट जिल्लाको उपाधि बाकेले प्राप्त गर्दा बिद्यालयतर्फ बाग्लुङको न्यु मोडल एकेडेमी उत्कृष्ट प्रशिक्षण दिने संस्था बन्यो । राष्ट्रिय खेलकुद परिषद्का सदस्य राजु श्रेष्ठले खेलाडी तथा प्रशिक्षकलाई सम्मान गरेका थिए । सो अवसरमा आईटिएफका संस्थापक लिलबहादुर थापामगर,आईटिएफका अध्यक्ष अन्जुनाथ श्रेष्ठ,उपाध्यक्ष चेतन गिरी,कार्यक्रम संयोजक अन्जन धमलालगायतको उपस्थिति रहेको थियो । अठारौं बर्षगठको अवसरमा आईटिएफले बिहिवार पशुपति नाथ बृद्धआश्रमका २ सय ५० बृद्ध–बृद्धालाई भोजन ग्रहण गराएको छ ।
