काठमाडौं (हाम्रो खेलकुद) – नेपाली राष्ट्रिय पुरुष भलिबल टोली तथा नेपाली सेनाका मिडल ब्लकर हरि बहादुर अधिकारी वैवाहिक बन्धनमा बाधिएका छन् ।
दुई वर्षको प्रेमसम्वन्धमा रहेका ओखलढुंगाका हरिले इनरुवाकी पवित्रा खड्कासँग शुक्रबार लगनगाँठो कसेका हुन् । उनीहरुको विवाह भक्तपुरमा भएको हो ।
हरिले सन् २०१७ मा माल्दिभ्समा भएको तेस्रो एभीसी एसियन सेन्ट्रल जोन सिनियर पुरुष भलिबल च्याम्पियनसिपबाट राष्ट्रिय टोलीमा डेब्यु गरेका थिए । उनले डेब्युमै टोलीबाट कास्यपदक जित्न सफल भएका थिए । जुन कास्यपदक नेपाली पुरुष भलिबल टोलीको ऐतिहासिक पदक हो ।
त्यसपछि उनी लगातार टोलीमा पर्न सफल भएका छन् । उनले राष्ट्रिय टोलीबाट २०१८ मा भएको जाकार्ता एसियन्स गेम्स, चौथो र पाँचौ सेन्ट्रल जोन र गत वर्ष नेपालका भएको १३औं दक्षिण एसियाली खेलकुद (साग) खेलेका थिए ।
