पोखरा (हाम्रो खेलकुद) – कास्की जिल्ला भलिबल संघको आयोजनामा पोखरामा ४ देखि ८ फागुनसम्म गण्डकी प्रदेश प्रथम मुख्यमन्त्री कप जिल्लास्तरीय पुरुष तथा महिला भलिबल प्रतियोगिता हुने भएको छ ।
पोखरा रंगशालास्थित भलिबल खेल मैदानमा हुने प्रतियोगितामा प्रदेशका ११ वटै जिल्लाबाट प्रतिनिधित्व हुने गरी महिलातर्फ ११ र पुरुषतर्फ ११ टिमको सहभागिता हुनेछ ।
संघले पोखरामा मंगलबार पत्रकार सम्मेलनमार्फत प्रदेशको सम्वन्धित जिल्लाबाट छनोट भएर आउने टोलीलाई प्रतियोगितामा सहभागी गराइने बताए । संघका अध्यक्ष भीम पराजुलीले प्रतियोगितामा उत्कृष्ट प्रदर्शन गर्ने खेलाडीलाई नवौँ राष्ट्रिय खेलकुदका लागि गण्डकी प्रदेशको टिमका लागि बन्द प्रशिक्षणमा राखिने बताएको छ ।
अन्तिम छनोटमा परेकाहरुलाई ३ महिना बन्द प्रशिक्षणमा राखिनेछ । सोही टिमले पोखरामै हुने आउँदो नवौं राष्ट्रिय खेलकुदका लागि यस प्रदेशबाट खेल्नेछ ।
महिला तथा पुरुष दुवैतर्फ विजेताले २ लाख, उपविजेताले १ लाख, तेस्रोले ५० हजार नगदसहित कप, मेडल र प्रमाणपत्र पुरस्कार पाउने प्रतियोगिता संयोजक खगेन्द्र गौचनले जानकारी दिए । प्रतियोगिताका उत्कृष्ट खेलाडी, स्पाइकर, ब्लकर, सेटर, लिवेरो र उत्कृष्ट सर्भरले ५ हजार नगदसहित ट्रफी र प्रमाणपत्र पुरस्कार पाउनेछन् ।
नेपाल भलिबल संघका सचिव डीबी नेपाललीले मुख्यमन्त्रीको नामसँग जोडिएको प्रतियोगितालाई गण्डकी प्रदेश सरकारले वार्षिक कार्यक्रममै समेटेकोले प्रदेश सरकारबाट पनि भरपूर सहयोग हुने दाबी गरे ।
पश्चिमाञ्चल क्षेत्रीय खेलकुद विकास समिति निर्देशक कृष्ण तिमिल्सिनाले प्रतियोगिता मुख्यमन्त्री कप गर्नका लागि मात्र नभई नवौं राष्ट्रिय खेलकुद प्रतियोगिताका लागि प्रतिभा छनोट गर्न अवसर जुरेको बताए ।
