काठमाडौं (हाम्रो खेलकुद)– नेपालले दोस्रो हेरोज अन्तराष्ट्रिय तेक्वान्दो च्याम्पियनसिपमा प्रतियोगीता चार स्वर्ण र तीन रजत पदक जितेको राष्ट्रिय खेलकुद परिषद् (राखेप) ले जनाएको छ ।
थाइल्यान्डको राजधानी बैककमा सम्पन्न प्रतियोगितामा नेप्लिज तेक्वान्दो एकेडेमीले नेपालको प्रतिनिधित्व गरेका थिए । प्रतियोगितामा भाग लिन नेप्लिज तेक्वान्दोका चार र अन्य दुई खेलाडी बैकक पुगेका थिए । शनिबार सम्पन्न प्रतियोगितामा विवेक श्रेष्ठ, चन्दु शाही,पुष्ष्प्रसाद गौतम र प्रतिज्ञा भण्डारीले स्वर्ण पदक जितेका थिए ।
एकेडेमीका खेलाडी विवेक श्रेष्ठले पुम्सेमा भारतीय खेलाडी हराउँदै स्वर्ण पदक जिते । विवेकले तौल समूहबाट पनि रजत पदक हासिल गरे । जसमा उनी थाइल्यान्डका खेलाडीसँग पराजित भएको थिए ।
एकेडेमीकै चन्दु शाहीले काजकिस्थानको खेलाडीलाई हराउंदै पुम्सेमै स्वर्ण पदक हासिल गरिन् । पुष्पप्रसाद गौतमले पनि फाइनलमा मलेसियालाई हराउंदै स्वर्ण जिते । तौल समूहमा प्रतिस्पर्धा गरेकी प्रतिज्ञा भण्डारीले थाइल्यान्डकी खेलाडीलाई हराउँदै पहिलो स्थान हासिल गरिन् ।
एकेडेमीका प्रमुुख प्रशिक्षक तथा खेलाडी अशोक खड्काले फाइनलमा थाइल्यान्डका खेलाडीसँग हुंदै रजत पदक प्राप्त गरे । तिलक लामाले भने ८० केजी तौल अन्तर्गत भएको खेलमा भारतसंग पराजित हुंदै रजत पदक प्राप्त गरे ।
