काठमाडौं (हाम्रो खेलकुद) – प्रभातफेरि युथ क्लब (पिवाइसी) ले प्रथम ओएसआर डिजिटल ओपन फुटसलको उपाधि जितेको छ । घोडेजात्राको उपलक्ष्यमा आयोजना भएको फुटसल प्रतियोगितामा शनिबार साँझ ध्रुबतारा फुटबल क्लबलाई ६–२ ले हराउँदै पिवाइसीले उपाधि जितेको हो ।

पिवाईसीले उपाधिसहित ५५ हजार ५ सय ५५ रुपैयाँ र ध्रुबताराले ३३ हजार ३ सय ३३ रुपैयाँ प्राप्त गरे । विजेता र उपविजेतालाई अभिनेता अनुपविक्रम शाहीले पुरस्कृत गरे । अन्य पुरस्कार इनास बेल्जियम अध्यक्ष तथा कलाकार श्याम श्रेष्ठ, अभिनेत्री कोरियोग्राफर पवित्रा आचार्य, निर्देशक वसन्त निरौलाले प्रदान गरे ।

नकआउटका आधारमा भएको उत्कृष्ट गोलकिपर विजेता टिम पिवाइसीका आशिष महत र उत्कृष्ट खेलाडी ध्रुवताराका सुभराज महत चुनिए । दुवैले समान ५ हजार ५ सय ५५ रुपैयाँसँगै ट्रफी प्राप्त गरे । फेयरप्ले टोली चुनिएको ग्याजेट सोलुसनले ९ हजार ९ सय ९९ रुपैयाँ प्राप्त गरे ।

हिमालयन फुटसल क्लबको आयोजनामा भाटभटेनी हेल्थ क्लब चुच्चेपाटीमा २ दिन चलेको प्रतियोगितामा ३२ टोलीको सहमागिता थियो । हिमालयन एफसीका अध्यक्ष विनोद कार्कीले पहिलोपटक आयोजित प्रतियोगितालाई सफलतापूर्वक सम्पन्न गर्न सहयोग गर्ने सबैलाई धन्यवाद दिदै आउने दिनमा अझै ठूलो धनराशीको प्रतियोगिता आयोजना गर्ने बताए ।