काठमाडौं (हाम्रो खेलकुद) – चीनको हाङ्गचौंमा सम्पन्न १९ औं एसियाली खेलकुद (एसियाड) पदक विजेता टोलीका खेलाडी, प्रशिक्षक तथा अफिसियलहरुलाई आज मंगलबार अन्तर्राष्ट्रिय विमानस्थलम स्वागत गरिएको छ ।

करातेकी रजत पदक विजेता एरिका गुरुङ र महिला कबड्डी टोलीलगायत उनीहरुका प्रशिक्षक, व्यवस्थापकलाई सांसद बद्री पाण्डे, देवेन्द्र पौडेल, नेपाल ओलम्पिक कमिटि (एनओसी) का अध्यक्ष जीवन राम श्रेष्ठ, महासचिव निलेन्द्र राज श्रेष्ठ, राष्ट्रिय खेलकुद परिषद् (राखेप) का निमित्त सदस्य सचिव प्रकाश कुसारी, राखेपका प्रशासन विभागका प्रमुख प्रेम मल्ल, नेपाल कराते महासंघका अध्यक्ष एवं राखेपका पूर्व सदस्य सचिव युवराज लामा र महासचिव दावा गुरुङ्ग, कर्मचारी संघका अध्यक्ष सरस्वती के.सी., पूर्व अध्यक्ष रञ्जन थापा लगायतले खेलाडीलाई स्वागत गरेका थिए ।

एसियाडमा नेपालले २९ खेलमा २ सय ५३ खेलाडी सहभागी थिए । त्यसमा एरिकाले करातेको ६८ केजीमा रजत पदक जितेकी थिइन् । कराते इतिहासमा एसियाडमा नेपालले रजत पदक जितेको यो पहिलो अवसर हो । पहिलो सहभागितामा नै महिला कबड्डी टोली पदक जित्न सफल भएको थियो ।

खेलाडीहरुलाई विमानस्थलबाट नगरका विभिन्न स्थानको परिक्रमा गरि राखेपमा विशेष कार्यक्रमबीच स्वागत र सम्मान गर्ने कार्यक्रम भने स्थगित गरिएको थियो । इजरायलमा हमास आक्रमणबाट १० नेपालीको मृत्य भएकाले सरकारले मंगलबार शोक दिवस घोषणा गरेको थियो । त्यसै कारण राखेपले औपचारिक कार्यक्रम स्थगित गरेको थियो । राखेप परिसरमा पदक विजेता खेलाडीहरुको अनौपचारिक भेटघाट राखिएको थियो ।