काठमाडौं (हाम्रो खेलकुद) – नेपालको पुरुष र महिला राष्ट्रिय बिच भलिबल टोली भुटानमा जारी काभा बिच भलिबल च्याम्पियनसिपको सेमिफाइनलमा प्रवेश गरेका छन् ।

महिला टोली लगातार तेस्रो जितका साथ सेमिफाइनलमा प्रवेश गर्न सफल भएको हो । पहिलो दिन एक खेल जितेको कमला पुन र मनिष चौधरीको जोडीले दोस्रो दिन शुक्रबार थप दुई जित निकाल्दै अन्तिम चारमा स्थान पक्का गरेको हो ।

भुटानको राजधानी थिम्पुस्थित चाङ्लिमिथाङ राष्ट्रिय रंगशालामा शुक्रबार कमला र मनिषाको जोडीले उज्वेकिस्तान र माल्दिभ्सलाई पराजित गर्दै शत प्रतिशत नतिजाका साथ सेमिफाइनलमा प्रवेश गरेको हो । नेपालले उज्वेकिस्तानलाई २१–१७ र २१–१५ ले तथा माल्दिभ्सलाई २१–१४ र २१–१६ ले हरायो ।

यता, पुरुषतर्फ पहिलो दिन पराजित मान बहादुर श्रेष्ठ र दिल बहादुर सुनारको जोडीले दोस्रो दिन लगातार तीन जित निकाल्दै अन्तिम चारको स्थान तय गर्न सफल भएको हो ।

शुक्रबार भुटानलाई २१–१४ र २१–२१ ले हराएर सुखद् सुरुवात गरेको नेपालले त्यसपछि उज्वेकिस्तानलाई २१–१५ र २१–१५ ले हरायो । समूह चरणको अन्तिम खेलमा नेपालले ताजकिस्तानलाई २१–१३ र २१–१७ ले पराजत गर्यो ।

सेमिफाइनल र फाइनलका खेलहरु शनिबार नै हुनेछ । च्याम्पियनसिपमा पुरुषमा १० टोली र महिलामा ७ टोलीको सहभागिता रहेको छ ।

महिलामा नेपालसहित माल्दिभ्स, आयोजक भुटान र उब्जेकिस्तानको सहभागिता रहेको छ । नेपाल बाहेक सबै राष्ट्रबाट दुई टोलीले खेल्नेछन् । पुरुषमा नेपाल, माल्दिभ्स, उज्वेकिस्तान, तुर्केमिनिस्तान र भुटानले प्रतिस्पर्धा गर्दैछन् ।

दुई वर्षअघि बंगलादेशको कक्स बजारमा भएको एभिसी सेन्ट्रल जोन बिच भलिबलमा नेपालका पुरुष र महिला टोली दुवैले रजत पदक जितेको थियो ।