काठमाडौं (हाम्रो खेलकुद)- राष्ट्रिय खेलकुद परिषद (राखेप) ले नेपाल भलिबल संघका अध्यक्ष जितेन्द्र बहादुर चन्दको संयोजकत्वमा भलिबल कभर्ड हल निर्माणका लागि ३ सदस्यीय उप समिति गठन गरेको छ।

सदस्य सचिव स्तरीय निर्णयले समिति गठन गरेको राखेपले जनाएको छ। उपसमितिको सदस्यहरूमा अन्तर्राष्ट्रिय भलिबल रेफ्री गौतम प्रसाद लासिवा र राखेपका इन्जिनियर शिवचन्द्र यादव रहेका छन्।‌

उप समितिले अन्तराष्ट्रिय स्तरको सुविधा सम्पन्न कभर्ड हल निर्माणका लागि सबैभन्दा पहिले जग्गा छनोट गर्नेछ। छनोटपछि विभिन्न सरकारी निकाय तथा स्थानिय तहसँग समन्वय गरी जग्गा प्राप्तीका लागि प्रारम्भिक चरणको काम कार्बाही गर्नेछ।

जग्गा पहिचान पछि यही असोज महिना भित्र डिपिआरको आधार तयार गर्न उपसमितिलाई कार्यदेश समेत दिइएको बताइएको छ। उपसमितिले कार्यदेश अनुसारको काम सम्पन्न गरि ३० दिन भित्र परिषदमा प्रतिवेदन पेश गर्न भनिएको छ।

नेपालको राष्ट्रिय खेल भलिबल पनि‌ आफ्नो‌ कभर्ड हल छैन। प्रशिक्षण र अन्तराष्ट्रिय प्रतियोगितालाई अहिलेसम्म राखेपको कभर्ड हलले जेनतेन धानेको छ।

तर अन्तर्राष्ट्रिय प्रतियोगितामा दर्शक धान्न नसक्ने अवस्था रहँदै आएको छ। भलिबलले कभर्ड हलको अभावकाबीच नतिजा भने दिदै आएको छ।

पछिल्लो पटक गत महिना सम्पन्न काभा महिला भलिबल नेसन्स लिगमा नेपाल दोस्रो हुँदा धेरैको नजर महिला भलिबलमा परेको थियो।

राष्ट्रिय खेलाडीहरूले पनि कभर्ड हलको माग गर्दै आएका छन। यही दबाबका कारण परिषदले उप समिति गठन गरेको अनुमान लगाउन सकिन्छ। जुन सुखद संकेत पनि हो।

भलिबल संघले बारम्बार जग्गा प्राप्तिको लागि माग गर्दै आएको छ। जग्गा उपलब्ध भएमा सुविधा सम्पन्न कभर्ड हल निर्माणमा अन्तर्राष्ट्रिय सहयोग प्राप्त हुने बताउँदै आएको छ।