काठमाडौं (हाम्रो खेलकुद)- नेपाल राष्ट्रिय तथा अन्तर्राष्ट्रिय खेलाडी संघ (एनएनआइपिए) ले छिटो भन्दा छिटो दसौं राष्ट्रिय खेलकुद आयोजनाका विषयमा प्रष्ट पार्न सरकारसँग आग्रह गरेको छ।

अध्यक्ष दीपक श्रेष्ठको नेतृत्वमा एनएनआइपिएको टोलीले मंगलवार युवा तथा खेलकुदमन्त्री तेजुलाल चौधरी र राष्ट्रिय खेलकुद परिषद (राखेप) का सदस्य सचिव टंकलाल घिसिङललाई दसौंका विषयमा ध्यानाकर्षण पत्र बुझाएको छ।

दसौं राष्ट्रिय खेलकुद आयोजनाको विषयमा स्थानिय आयोजकका रुपमा रहेको कर्णाली प्रदेश खेलकुद परिषदले काउन्ड डाउन सुरु गरिसकेको जानकारी प्राप्त भएको उल्लेख गर्दै एनएनआइपिएले ध्यानाकर्षण पत्रमा भनेको‌ छ, ‘संघिय सरकार वा राखेपले पूर्व निर्धारित मिति (२०८१ मंसिर २ देखि ९ गतेसम्म) मा आयोजना हुने नहुने प्रष्ट पारेको छैन । जसले गर्दा देशभरका खेलाडीमा अन्यौलता सिजृना भएको छ ।’

‘यो शंकालाई यथासक्य निवारण गर्नका लागि सरकारबाट छिटो भन्दा छिटो दसौं राष्ट्रिय खेलकुदका विषयमा प्रष्ट जानकारी देशभरका खेलाडी र खेलकर्मीलाई दिन राखेपको अध्यक्ष समेत रहेका खेलकुद मन्त्रीमार्फत सरकारको ध्यानाकषर्ण गराउँदछौं,’ पत्रमा भनिएको छ।

दुई वर्षअघि गण्डकी प्रदेशमा‌ भएको नवौं राष्ट्रिय खेलकुदको समापनका दौरानमा दसौंको मिति घोषणा गरिएको थियो। त्यसैलाई मध्यनजर गर्दे कर्णाली प्रदेश सरकारले प्रदेश रंगशालालगायतको भौतिक पूर्वाधार निर्माणको अन्तिम चरणमा छ।

कर्णाली प्रदेश खेलकुद परिषद्ले दसौंको लोगो, मस्कट, गित तयार‌ गरिसकेको छ भने २४ खेलको खेलस्थल र मितिको प्रस्ताव राखेपलाई बुझाइसकेको छ।