पोखरा (हाम्रो खेलकुद)- लामाचौर कप भलिबलमा एपिएफले दुवैतर्फको उपाधिका लागि प्रतिस्पर्धा गर्ने भएको छ।

फाइनलमा एपिएफले महिलातर्फ टिप‌ टप न्यु डायमण्ड स्पोर्टस क्लब र पुरुषतर्फ अर्को विभागीय टोली नेपाल पुलिस क्लबको सामना गर्नेछ ।

नव आदर्श सामुदायिक विकास समाजको आयोजनामा पोखरा १९ लामाचौरस्थित इन्द्रराज्य लक्ष्मी माविको खेल मैदानमा जारी प्रतियोगिताको लिग चरण बिहीवार सकिएको छ।

लिग चरणको महिलातर्फको अन्तिम खेलमा न्यु डायमण्डले एपिएफलाई ३–० को सोझो सेटमा हराउँदै शीर्षस्थानमा रह्यो ।

पहिलो सेट २५-१८ ले आफ्नो पक्षमा पारेको डायमण्डले दोस्रो सेट २५-२३ र तेस्रो सेट समेत २५-२३ ले हराउँदै न्यु डायमण्डको ९ अंक पुगेको थियो।

न्यु डायमण्डले लिगचरणमा गण्डकी र एभरेष्ट भलिबललाई ३-० को सोझो सेटमा हराएको थियो । त्यो खेलअघि नै न्यु डायमण्ड र एपिएफ फाइनल पुगिसकेका थिए।

एपिएफ दोस्रो स्थानमा रह्यो । एपिएफको कुल ३ खेलबाट ६ अंक रह्यो । एपिएफले लिग चरणमा एभरेष्टलाई ३-० को सोझो सेट र गण्डकीलाई ३-१ को सेटमा हराएको थियो ।

अर्को खेलमा एभरेष्टले गण्डकी प्रदेशलाई ३-० को सोझो सेटमा हरायो । पहिलो सेट प्रतिस्पर्धात्मक रहेपनि नतिजा भने एभरेष्टको पक्षमा २६-२४ रह्यो । दोस्रो सेटमा २५-१३ र तेस्रो सेटमा २५-१९ ले हराउँदै एभरेष्टले जित हासिल गरेको हो । यो संगै एभरेष्टले ३ खेलमा १ जित र २ हारसहित ३ अंक जोड्यो। अंकविहिन गण्डकी अन्तिममा रह्यो ।

पुरुषतर्फ पुलिस एक अगावै फाइनल प्रवेश गरेपनि अन्य टिमको टुंगो भने विहिबारमात्रै लाग्यो । बुधबार निर्धारित समयअनुसार एपिएफ र गण्डकीको खेल खराब प्रकाशका कारण हुन नसकेपछि विहिबार विहानमात्रै खेल भएको थियो । उक्त खेलमा एपिएफले गण्डकीलाई
३-० को सोझो सेटमा हराउँदै फाइनलको यात्रा तय गरेको हो । एपिएफले गण्डकीमाथि २५-१८, २५-२३ र २५-१६ को हार व्यहोरेको हो । एपिएफको दुई खेलबाट ६ अंक छ । दुवै टोलीको समान६ अंकसहित फाइनल पुगे।

शीर्षस्थानको लागि लिगचरणको अन्तिम पुलिस र एपिएफको खेल समेत प्रकाश अभावका कारण रोकिएको छ । पुलिस र एपिएफले १-१ सेट जित्दा खेल स्थगित भएको हो । पहिलो सेट पुलिसले २५-१८ ले आफ्नो पक्षमा पारेको थियो । दोस्रो सेटमा पुलिस १९-२५ ले पछि पर्यो ।

गण्डकीले गलकोटलाई ३-२ को सेटमा हरायो । पहिलो सेट २५-२२ ले जितेको गण्डकीले दोस्रो सेट २१-२५ ले गुमायो । तेस्रो सेट २५-१७ जितेपनि पुनः चौथो सेटमा २४-२६ को हार व्यहोर्यो । अन्तिम तथा फाइनल सेटमा गण्डकी १५-१३ को जित निकाल्न सफल भएको हो । यो संगै गण्डकीको ३ खेलबाट २ अंक रहँदा गलकोटको १ अंक रह्यो ।

शुक्रवार महिलाको तेस्रो स्थान र फाइनल तथा त्यसपछि पुरुषतर्फको तेस्रो स्थान र फाइनल हुनेछ।