काठमाडौं(हाम्रो खेलकुद) – चितवन शक्तिले वात्सल्य एभरेष्ट महिला भलिबल लिग (इडब्लुभिएल) मा विजयी सुरुवात गरेको छ ।

लिगको पहिलो खेलमै जित हात पार्ने क्रममा चितवनले सोमवारको तेस्रो खेलमा पोखरा थन्डर्सलाई ३-१ को सेटमा पराजित गरेको हो ।

त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा चितवनले पहिलो सेट २५-२२ ले जितेकोमा दोस्रो सेट भने १९-२५ ले गुमाएको थियो । तेस्रो सेट २५-२३ र चौथो सेट २५-१७ ले जित्दै ३ अंक जोड्न सफल भयो ।

चितवनले आफ्नो दोस्रो खेलमा मंगलवार काठमाडौ स्पारकर्ससॅंग छ। गन्डकीले मंगलवारै कर्णाली यसभिससॅंग दोस्रो खेल खेल्दैछ ।

आजै भएको दोस्रो खेलमा कर्णाली यसभिसले मा मधेश युनाइटेडमाथि जित हासिल गरेको थियो । कर्णालीले मधेशमाथि ३-१ को सेटमा जित हात पारेको थियो ।

पहिलो सेट २५-१५, दोस्रो सेट २५-२० जितेको कर्णालीले अन्तिममा निरन्तर अंक गुमाउँदा तेस्रो सेट गुमायो । एक समय २४-१९ मा रहेर सहज जित तर्फ उन्मुख कर्णालीले निरन्तर अंक गुमाउँदा २६-२८ ले सेट गुमाउँन पुग्यो ।

कर्णालीले चौथो सेटमा भने २५-११ को सेटमा सहज रुपले जित निकाल्दै खेल जित्यो । कर्णालीले आफ्नो दोस्रो खेलमा मंगलवार गन्डकी थन्डर्ससँग खेल्नेछ । उता, मधेशले दोस्रो खेलमा मंगलवार नै ललितपुर क्विन्सको सामना गर्नेछ ।

आजै भएको पहिलो खेलमा ललितपुर क्विन्सले काठमाडौं स्पाइकर्सविरुद्ध ३-१ सेटको जित हात पारेको थियो । पहिलो सेट २५-२० ले आफ्नो पक्षमा पारेको ललितपुरले दोस्रो सेट भने २१-२५ ले गुमाउन पुगेको थियो ।

त्यसपछिका दुई सेट २५-२१ र २५-१९ ले आफ्नो पक्षमा पारेको ललितपुर पहिलो खेलमा नै पूरा ३ अंक जोड्न सफल भयो ।

तेस्रो सेटमा काठमाडौं र ललितपुर दुवै तर्फ खेलाडी घाइते हुँदा समस्या भएको थियो । काठमाडौंकी लिबेरो रश्मीता दुरा घाइते भएपछि कोपिला रानाले चौथो सेट लिबेरोमा खेलिन् । ललितपरुकी थाई स्पाइकर सुत्दाता पनि घाइते भएपछि खेल्न सकिनन् ।

६ टोलीले एकअर्काको सामना गरेपछि अंकतालिकाका शीर्ष दुई टोलीले असोज १९ गते फाइनल खेल्नेछन्।