काठमाडौं (हाम्रो खेलकुद)- चितवन शक्तिले‌ वात्सल्य एभरेष्ट महिला भलिबल लिग (इडब्लुभिएल) मा दोस्रो जित हासिल गरेको छ ।

शीर्ष दुईमा पर्ने अभियानलाई मजबुत गराउने क्रममा बुधवारको अन्तिम‌ खेलमा चितवनले मधेश युनाइटेडलाई ३-१ को सेटमा हराएको हो । ३ खेलमा चितवनले दोस्रो खेल जित्दा मधेशले लगातार तेस्रो खेलमा हार बेहोरेको छ।

त्रिपुरेश्वरस्थित राष्ट्रिय खेलकुद परिषद्को कभर्ड हलमा राष्ट्रिय भलिबल टोलीकी‌ कप्तान समेत रहेकी अरुणा शाही नेतृत्वको चितवनले मधेशलाई २५-२०,२५-१९,१९-२५,२५-२१ ले हराएको थियो।

मधेशकी मार्की खेलाडी निरुता ठगुन्ना चौथो सेटमा घाइते भएपछि टोली थप दबाबमा परेको थियो। चितवनको ६ अंक भएको छ।

बुधवारको दोस्रो खेलमा काठमाडौंले गण्डकी थन्डर्समाथि ३-१ सेटको जित हासिल गरेको हो ।
काठमाडौंले पहिलो सेट २५-२३ ले जितेकोमा दोस्रो सेट १९-२५ ले गुमाएको थियो । तेस्रो सेट २५-२१ र चौथो सेट २५-१६ ले जित्दै काठमाडौंले ३ अंक जोड्न सफल भयो ।

३ खेलमा २ जित हासिल गरेको काठमाडौंको ६ अंक भएको छ । पहिलो खेलमा काठमाडौं ललितपुर क्विन्ससँग पराजित भएको थियो । दोस्रो खेलमा भने चितवन शक्तिलाई पराजित गरेको थियो ।

गण्डकीले भने ३ खेलमा एउटै खेल जित्न सकेको छैन।
गण्डकी पहिलो खेलमा चितवन शक्तिसँग र दोस्रो खेलमा कर्णाली यश्वीजसँग पराजित भएको थियो ।

आजै भएको पहिलो खेलमा ललितपुर क्विन्सलाई पराजित गर्दै कर्णाली यश्विजले लगातार तेस्रो जित हासिल गरेको थियो । कर्णालीले पहिलो सेट २५-२२, दोस्रो सेट २५-२२ जितेको थियो । तेस्रो सेटमा ९-१ ले पछि परेको अवस्थामा उत्कृष्ट पुनरागमन गर्दै २९-२७ ले जित्दै कर्णालीले आफ्नो अपराजित यात्रा कायमै राखेको हो ।

ललितपुरले पहिलो खेलमा काठमाडौं स्पाइकर्सलाई र दोस्रो खेलमा मधेश युनाईडेटलाई पराजित गरेको थियो । उता, कर्णालीले भने पहिलो खेलमा मधेश युनाईटेडलाई पराजित गर्दा दोस्रो खेलमा गन्डकी थन्डर्सलाई हराएको गरेको थियो ।

इडब्लुभिएलमा बिहीवार पनि ३ खेल हुनेछन् ।