काठमाडौं (हाम्रो खेलकुद) – गण्डकी थन्डर्सले वात्सल्य एभरेस्ट महिला भलिबल लिग (इडब्लुभिएल) मा पहिलो जित हात पारेको छ ।

त्रिपुरेश्वरस्थित राष्ट्रिय खेलकुद परिषदको कभर्ड हलमा बिहीवारको अन्तिम खेलमा ललितपुर क्विन्सलाई ३-२ ले हराउँदै गण्डकीले लिगमा पहिलो जित हासिल गरेको हो ।

सुरूवात देखि नै खेल निकै रोमान्चक र प्रतिस्पर्धात्मक बनेको थियो । प्रतिस्पर्धात्मक पहिलो सेट ललितपुरले २९-२७ ले जितेको थियो । दोस्रो र तेस्रो सेटमा जित हात पार्दै गण्डकीले खेलमा २-१ को अग्रता बनाएको थियो । गण्डकीले दोस्रो सेट २५-२३ र तेस्रो सेट २५-१२ ले जितेको थियो ।

चौथो सेट २५-१३ जित्दै ललितपुरले खेल पाँचौ सेटमा पुर्यायो । पाँचौ सेटमा १५-६ को सहज जित निकाल्दै गण्डकीले प्रतियोगिताको पहिलो जित हात पार्यो । गण्डकी यसअघि चितवन शक्ति, कर्णाली यश्वीज र काठमाडौं स्पाइकर्ससँग पराजित भएको थियो ।

पहिलो खेलमा काठमाडौं र दोस्रोमा मधेश युनाइटेडलाई हराएको ललितपुरको यो लगातार दोस्रो हार हो । तेस्रो खेलमा ललितपुर कर्णालीसँग पराजित भएको थियो ।

हारपछि ललितपुरको फाइनल यात्रा कठिन बनेको छ । लिगको आफ्नो अन्तिम खेलमा ललितपुरले चितवन शक्तिलाई हराएर मात्र पुग्दैन। ९ अंक जोडेर दोस्रो स्थानमा रहेको काठमाडौंको हारको नतिजा पनि कुर्नुपर्नेछ ।

बिहिवार नै भएका अन्य खेलमा काठमाडौंले मधेशलाई ३-१ ले हराएको थियो। दोस्रो खेलमा चितवन शक्तिलाई हराउँदै कर्णालीले फाइनलमा स्थान पक्का गरेको थियो ।
काठमाडौंको जितपछि मधेश र गण्डकी बाहिरिएका‌ थिए।

इडब्लुभिएलमा आज अन्तिम ३ खेल हुदैछन् । शीर्ष दुई टोली बीच शनिवार फाइनल हुनेछ।