काठमाडौं (हाम्रो खेलकुद) – नेपाली सेनाकी कमला श्रेष्ठले प्रथम स्ट्रोङगेष्ट २०१७ सुनिललाल जोशी स्मृती भारोत्तोलन प्रतियोगितामा तीन राष्ट्रिय कीर्तिमान बनाएकी छन् ।

काठमाडौ जिल्ला भारोत्तोलन संघको आयोजनामा भएको प्रतियोगिताको महिला ६३ केजी जुनियरतर्फ कमलाले स्नाचमा ६२ केजी, क्लिन एण्ड जर्कमा ८१ केजीका साथ कुल १ सय ४३ केजी भार वहन गर्दै नयाँ कीर्तिमान बनाएकी हुन् । यसअघि २०७० मा काठमाडौमा भएको लुम्बिनी च्याम्पियनसिपमा सोनम चौधरीले स्नाचमा ३५ , क्लिन एण्ड जर्कमा ५३ र कुलमा ८८ केजी तौलको कीर्तिमान कायम गरेकी थिइन् ।

कमलाले जितेको तौल समूहमा नेपाली सेनाकी मनिता श्रेष्ठ ६१ र ८० केजी गरि कुल १ सय ४१ भार उठचाउँदै दोस्रो स्थान हासिल गरिन् । त्यसै तौलको सिनियरतर्फ सप्तरीकी शान्ति चौधरीले स्नाचमा ५५ केजी, क्लिनमा ६८ केजीका गरि कुलमा १ सय २३ केजीका साथ पहिलो र नेपाली सेनाकी उषा खड्का स्नाचमा ५५, क्लिनमा ६७ केजी सहित कुलमा १ सय २२ केजीका साथ दोस्रो भइन् ।

प्रतियोगिताको सिनियर ५३ केजी तौलमा बाँकेकी सञ्जु चौधरीले क्लिनमा ८१ केजी भार बहन गर्दै आफ्नै नाममा रहेको कीर्तिमान सुधार गरिन् । यसअघि उनले एशियन युथ एण्ड जुनियर च्याम्पियनसिपमा ८० केजी भारका साथ कीर्तिमान बनाएकी थिइन् । उनले स्नाचमा ५७ र कुलमा १३८ केजीका साथ स्वर्ण प्राप्त गरिन् । दोस्रो भएकी झापाकी सुमी भट्टराईले २२, २७ र कुलमा ४९ केजीका साथ रजत पदक प्राप्त गरिन् ।

त्यसै स्पर्धाको जुनियरतर्फ बाँकेकी कविता चौधरीले स्नाचमा ३५, क्लिनमा ५१ र कुलमा ८६ केजीका साथ स्वर्ण, सप्तरीकी सन्तोषी यादवले २७, ३४ र कुलमा ६१ केजीका साथ रजत र पर्साकी रविना बस्नेतले ३०, ३० र ६० केजीका साथ कास्य पदक प्राप्त गरिन् ।