दीपक न्यौपाने
बुटवल – बुटवल उप महानगरपालिकाको २५ वर्षे रणनीतिक योजना बनाउने गरि योग गुरुङको संयोजकत्वमा खेलकुद क्षेत्र विज्ञ उपसमिति गठन भएको छ । उपमहानगरपालिको हलमा भएको छलफलले खेलकुदको विकास गर्दै दीर्घकालिन योजना बनाउने लक्ष्यसहित गुरुङको संयोजकत्वमा दुईजना अध्ययनकर्ताहरु रहने गरि प्रारम्भिक टोली गठन भएको हो ।

जसको अध्ययनकर्ताहरु विष्णु कुमार श्रेष्ठ र दीपक न्यौपाने रहेका छन् । उप महानगरपालिकाले बनाउने अल्पकालिन र दीर्घकालिन योजना तर्जुमामा टोलीले अध्ययन गरेर सुझावहरु दिने छ । बुटवलमा संचालन हुने विभिन्न खेलकुद गतिविधिहरुलाई समेत ब्यवस्थापन गर्दै बजेट विनियोजनामा समेत टोलीको सुझाव महत्वपूर्ण हुने छ ।

कार्यक्रममा खेलकुद क्षेत्र विज्ञ उपसमितिका सदस्य सचिव सितु प्रसाद श्रेष्ठले नगरस्तरीय अल्पकालिन र दीर्घकालिन योजना बनाउन सहयोगका निम्ति सल्लाहकार समितिका रुपमा टोली गठन गरिएको बताए । रुपन्देही जिल्ला खेलकुद समितिका अध्यक्ष योग गुरुङले खेल क्षेत्रमा आर्थिक समस्या सम्बोधन गर्न जरुरी रहेको समेत बताए ।

पश्चिमाञ्चल भलिबल संघका उपाध्यक्ष विष्णु कुमार श्रेष्ठले सबै खेललाई समेटेर अघि लैजानुपर्ने सुझाव दिए । रुपन्देही जिल्ला फुटबल संघका अध्यक्ष दीर्घबहादुर केसी देविनगरलाई नै खेलग्रामको रुपमा विकास सुझाव दिए । नेपाल सितोरियो कराते–डो, रुपन्देहीका अध्यक्ष उमेश थापाले विद्यालयस्तरमा नै प्रशिक्षकको ब्यवस्था गरि खेलाडी उत्पादनमा लाग्नुपर्ने बताए ।