भरतपुर (हाम्रो खेलकुद) – नेपाल एपिएफ क्लबले प्रथम मेयर कप अन्तर्राष्ट्रिय आमन्त्रण महिला भलिबलको उपाधि जितेको छ । शिवम् न्यू डायमण्ड काठमाडौंलाई ३–० को सेटमा पराजित गर्दै एपिएफ च्याम्पियन बनेको हो ।

प्रतिस्पर्धात्मक पहिलो सेटमा २९–२७ को जितेको एपिएफले त्यसपछिका दुई सेट २५–१६ र तेस्रो सेट २५–२१ ले आफ्नो पक्षमा पार्यो । गत महिना एपिएफलाई हराउँदै न्यू डायमण्डले शिवम् न्यू डायमण्ड कप भलिबल उपाधि जितेको थियो ।

उपाधिसँगै एपीएफले २ लाख रूपैयाँ र न्यू डायमण्डले १ लाख रुपैयाँ प्राप्त गर्यो । नेपाल पुलिस क्लबले प्रतियोगितामा तेस्रो स्थान प्राप्त गरेको छ । अर्को विभागिय टोली त्रिभुवन आर्मी क्लबलाई २५–१६, २५–१९ र २५–२० को सोझो सेटमा पराजित गर्दै पुलिस तेस्रो भएको थियो । पुलिसले ५० हजार र आर्मीले २५ हजार रुपैयाँ प्राप्त गर्यो ।

सरस्वती सर्वोत्कृष्ट
एपिएफकी सरस्वती चौधरी सर्वोत्कृष्ट खेलाडी घोषित भएकी छिन् । एपिएफलाई उपाधि दिलाउन महत्वपूर्ण भूमिका निर्वाह गरेकी उनल सवोत्कृष्ट खेलाडी भएवापत १० हजार रुपैयाँ प्राप्त गरिन् ।

न्यू डायमण्डकी प्रतिभा माली उत्कृष्ट स्पाइकर, सोही क्लबकी कृपा अधिकारी उत्कृष्ट सर्भर, पुलिसकी कमला पुन उत्कृष्ट सेटर, एपिएफकी उषा विष्ट उत्कृष्ट ब्लकर, सोही क्लबकी मनीषा तामाङ उत्कृुष्ट डिफेन्डर घोषित भए । आर्मीकी निरुता ठकुन्ना प्रतिभावान खेलाडी घोषित भइन् । उत्कृष्ट र प्रतिभावान खेलाडीले जनही ५ हजार रुपैयाँ प्राप्त गरे ।