काठमाडौं (हाम्रो खेलकुद) –दुई विभागीय टोली त्रिभुवन आर्मी क्लब र नेपाल पुलिस क्लब तेस्रो संस्करणको प्रधान सेनापति राष्ट्रिय पुरुष भलिबल प्रतियोगिताको सेमिफाइनलमा प्रवेश गरेका छन् । आर्मी र पुलिस अपराजित रहँदै समूह ‘ए’ र समूह ‘बी’ बाट एक खेल अगावै सेमिफाइनलमा पुग्न सफल भएको हो ।
यस्तै समूह ‘बी’ बाट पश्चिमाञ्चल पनि अपराजित रहँदै सेमिफाइनल नजिक पुगेको छ । समूह ‘बी’ मा पुलिस र पश्चिमाञ्चल अपराजित छन् । बिहिबार हुने समूह चरणको अन्तिम खेलले नै समूह ‘बी’ बाट विजेता र उपविजेता टुङ्गो लगाउनेछ ।
लगनखेलस्थित सैनिक शारीरिक तथा खेलकुद केन्द्रको कवर्डहलमा बुधबार भएको खेलमा आर्मीले अर्को विभागीय टोली नेपाल एपीएफमाथि ३–० को सहज जित निकाल्यो । एकपक्षीय खेलमा आर्मीले एपएफमाथि २५–२१, २५–२२ र २५–१८ को सहज जित निकाल्यो ।
बुधबारै भएको अर्को खेलमा विभागीय नेपाल पुलिस क्लबले पूर्वाञ्चलमाथि ३–० कै सहज जित निकाल्यो । पहिलो सेट २५–१० ले आफ्नो पक्षमा पारेको पुलिसले दोस्रो सेट २५–१७ ले जित्दा तेस्रो सेट २५–११ ले सहज पन्छायो ।
बुधबारकै अर्को खेलमा सुदूरपश्चिमले मध्यपश्चिममाथि ३–० कै सहज जित निकाल्दै सेमिफाइनल नजिक पुगेको छ । सुदूरले मध्यपश्चिममाथि २५–२१, २५–१९ र २५–२१ ले आफ्नो पक्षमा पा¥यो । अर्को खेलमा पश्चिमाञ्चलले मध्यमाञ्चलमाथि २५–१८, २५–२१ र २५–२२ को सेटमा पराजित गर्दै सेमिफाइनल यात्रा जीवितै राखेको छ ।
प्रतियोगिता अन्र्तगत बिहिबार समूह चरणका अन्तिम खेलहरु हुनेछ । मध्यपश्चिम र एपीएफ, पुलिस र पश्चिमाञ्चल, मध्यमाञ्चल र पूर्वाञ्चल तथा आर्मी र सुदूरपश्चिमबीच खेल हुनेछ । ३ विभागसहित तत्कालीन ५ प्रदेशसहित ८ टिमको सहभागिता रहने आयोजक सेनाले जनाएको छ । हरेक समूहका शीर्ष दुई टोली सेमिफाइनल प्रवेश गर्नेछन् ।
लिग कम नकआउटको आधारमा हुने प्रतियोगिताको विजेताले ३ लाख रुपैया प्राप्त गर्नेछ । दोस्रो हुनेले १ लाख ५० हजार र तेस्रो हुनेले ७५ हजार प्राप्त गर्नेछ । यस्तै प्रतियोगिताको उत्कृष्ट स्पाइकर, ब्लकर, डिफेन्डर, लिफ्टर र प्रशिक्षकले समान १० हजार प्राप्त गर्नेछ ।
