काठमाडौं (हाम्रो खेलकुद)– तेस्रो संस्करणको प्रधान सेनापति राष्ट्रिय पुरुष भलिबल प्रतियोगिताको उपाधिका लागि आयोजक त्रिभुवन आर्मी क्लब र पश्चिमाञ्चल विकास क्षेत्र भिड्ने भएका छन् । आर्मीले अर्को विभागीय टोली नेपाल पुलिस क्लबलाई तथा पश्चिमाञ्चलले विभागीय टोली नेपाल एपिएफ क्लबलाई पराजित गर्दै उपाधि भिडन्त पक्का गरेका हुन् ।

फाइनल खेल शनिबार हुनेछ । त्यसअघि तेस्रो स्थानका लागि पुलिस र एपीएफले प्रतिस्पर्धा गर्नेछ । लगनखेलस्थित सैनिक शारीरिक तथा खेलकुद केन्द्रको कवर्डहलमा बिहिबार भएको प्रतिस्पर्धात्मक खेलमा पश्चिमाञ्चलले एपिएफमाथि ३–२ को संघर्षपूर्ण जित निकाल्दै आर्मीसँगको भेट पक्का ग¥यो ।

पहिलो सेट २०–२५ ले गुमाएको पश्चिमाञ्चलले दोस्रो र तेस्रो सेट २८–२६ र २५–२३ ले आफ्नो पक्षमा पार्दै खेललाई २–१ ले आफ्नो नियान्त्रणमा राखेको थियो । प्रतिस्पर्धात्मक बनेको चौथो सेट २४–२६ ले गुमाएपछि खेल २–२ को अवस्थामा पुगेको थियो । निर्णायक सेटमा पश्चिमाञ्चलले १८–१६ को रोमाञ्चक र प्रतिस्पर्धात्मक जित निकाल्दै आर्मीसँगको भेट पक्का ग¥यो ।

शुक्रबार भएको पहिलो सेमिफाइनलमा विभागीय डर्बीमा आर्मीसँग पुलिस ३–० को सोझो सेटमा निरिह बन्यो । आर्मीले पुलिसमाथि २५–२०, २५–२१ र २५–१९ को सहज जित निकाल्यो । फागुन ६ गतेबाट शुरु भएको प्रतियोगितामा साविकको पाँच विकास क्षेत्र र तीन विभागीय टोली गरी ८ टिमले लिगकम नकआउटको आधारमा प्रतिस्पर्धा गरेका थिए ।

प्रतियोगिताको विजेताले ३ लाख रुपैया प्राप्त गर्नेछ । दोस्रो हुनेले १ लाख ५० हजार र तेस्रो हुनेले ७५ हजार प्राप्त गर्नेछ । यस्तै प्रतियोगिताको उत्कृष्ट स्पाइकर, ब्लकर, डिफेन्डर, लिफ्टर र प्रशिक्षकले समान १० हजार प्राप्त गर्नेछन् ।