काठमाडौं (हाम्रो खेलकुद) – नेपाल पुलिस क्लबले चौथो एनएसटी–एनभिए राष्ट्रिय महिला तथा पुरुष भलिबल प्रतियोगितामा दाहोरो सफलता प्राप्त गरेको छ ।
त्रिपुरेश्वरस्थित राखेप कभर्ड हलमा जारी प्रतियोगितामा सोमबार पुरुषतर्फ नयाँ बजार सामाजिक क्लबलाई २५–६, २५–९ र २५–१४ लाई सहजै हराएको पुलिसले महिलातर्फ जावलाखेल टे«ेनिङ सेन्टरलाई २५–११, २५–१० र २५–१२ को सोझो सेट हरायो ।
पुरुषतर्फको अर्को खेलमा नेपाल स्पोर्ट्स क्लबले रुपन्देहीको मणिमुकुन्द भलिबल क्लबलाई २५–१८, २३–२५, २५–२१ र ३४–३२ ले पराजित गर्यो । महिलातर्फको अर्को खेलमा शिवम् न्यू डायमण्ड एकेडेमीले चितवनको पद्मदय युथ क्लब चितवनलाई २५–१४, २५–१२ र २५–१८ ले हरायो ।
नेपाल भलिबल संघको आयोजनामा भइरहेको प्रतियोगिताको महिलातर्फ ७ र पुरुषतर्फ ११ टोलीले प्रतिस्पर्धा गरिरहेका छन् । प्रतियोगिताको दुवैतर्फका विजेताले १ लाख ५० हजार, दोस्रो टोलीले १ लाख र तेस्रो हुने टोलीले ६० हजार रुपैयाँ प्राप्त गर्नेछन् ।
दुवैतर्फको सर्वोत्कृष्ट खेलाडीले समान १५ हजार पाउनेछन् । त्यस्तै दुवैतर्फ उत्कृष्ट ब्लकर, लिफ्टर, स्पाइकर, लिब्रो, सर्भर र प्रशिक्षकले समान ५ हजार प्राप्त गर्नेछन् ।
