फिस्लिङ (हाम्रो खेलकुद) – सुर्जन तामाङले छैटौँ राष्ट्रिय कायाक स्लालोम च्याम्पियनसिपको उपाधि जितेका छन् ।
पर्वतीय खेलकुद महोत्सव अन्तर्गत त्रिशुली नदीमा जारी प्रतियोगिताको फाइनलमा नेपाल कायाक क्लबका सुर्जनले २४.४१ अंक हासिल गर्दै उपाधि जिते । कायाक क्लबकै सुमन थापा २४.६९ अंकका साथ दोस्रो तथा चितवन टिम फिस्लिङका विकास गुरुङ २४.८८ अंकका साथ तेस्रो भए । शीर्ष तीन खेलाडीहरु एसियाली खेलकुदका लागि छनोट भएका छन्।
नेपाल र्याफ्टिङ एण्ड क्यानोइङ संघको आयोजनामा सोमबारै भएको दोस्रो र्याफ्टिङ च्याम्पियनसिपअन्तर्गत स्प्रिन्ट विधाको उपाधि प्याडल नेपाल ‘ए’ ले जित्यो । निर्धारित दूरी २ मिनेट ९.६९ सेकेण्ड समयमा पुरा गर्दै प्याडल नेपाल ‘ए’ च्याम्पियन बनेको हो । नेपाल कायाक क्लबको ‘ए’ टिम (२ मिनेट १०.८२ सेकेण्ड) दोस्रो स्थान तथा टिम फिस्लिङ ‘बी’ (२ मिनेट १०.९० सेकेण्ड)ले तेस्रो स्थान हासिल गरे । प्रतियोगिताअन्तर्गत र्याफ्टिङको हेड टु हेड, स्लालोम र डाउनफल विधाको फाइनल खेलहरु मंगलवार हुनेछन् ।
