पर्वत (हाम्रो खेलकुद) – नेपाल एपिएफ क्लबले दोस्रो संस्करणको दिदी बहिनी कप राष्ट्रिय महिला भलिबल प्रतियोगिताको उपाधि जितेको छ । फाइनल खेलमा बिहिबार शिवम् न्यु डायमण्ड एकेडेमीलाई ३–१ ले हराउँदै एपिएफ च्याम्पियन बनेको हो । भलिबलमा एपिएफको महिला टोलीको यो सातौं उपाधि हो ।

 

एपिएफको महिला टोलीले राखेप च्याम्पियनसिपसहित पोखरामा तीज भलिबल, ढोरपाटन लिग, मेयर कप, पिएम कप र एनभिए क्लब च्याम्पियनसिपमा न्यु डायमण्डलाई पराजित गरेर उपाधि जित्न सफल भयो । न्यु डायमण्डले न्यु डायमण्ड कपमा एपिएफलाई पराजित गर्दै यस वर्ष पहिलो उपाधि जित्न सफल भएको थियो ।

एपीएफले आजको न्यु डायमण्डमाथि २५–१८, १२–२५, २५–१६ र २५–११ को जित निकाल्यो । तेश्रो स्थानका लागि भएको खेलमा नेपाल पुलिसले नेपाल आर्मीलाई ३–१ को सेटमा हरायो । पहिलो सेट २२–२५ ले गुमाएपनि पुलिसले खेलमा फर्कदै लगातर तीन सेट २५–२०, २५–२२ र २५–११ ले आफ्नो नाममा लेखायो । विजेता एपीएफले १ लाख, दोस्रो टोली न्यु डायमण्डले ६० हजार र पुलिसले पुलिसले ४० हजार नगद प्राप्त गरे ।

प्रतियोगिताको सर्वोत्कृष्ट खेलाडी घोषित एपिफकी सरस्वती चौधरीले १० हजार रुपैयाँ प्राप्त गरिन् । न्यु डायमण्डकी प्रतिभा माली उत्कृष्ट स्पाईकर चुनिदा कृपा अधिकारी उत्कृष्ट सेटर र सलिना श्रेष्ठले उत्कृष्ट डिफेन्सको उपाधि जिते । नेपाल पुलिसकी कमला पुनले उत्कृष्ट सर्भरको उपाधि हात पार्दा एपीएफकी उषा बिष्ट उत्कृष्ट ब्लकर भईन् । एपीएफकै ज्ञानेन्द्र बिष्ट उत्कृष्ट प्रशिक्षक चुनिए । उत्कृष्ट सबैले समान ३ हजार रुपैयाँ प्राप्त गरे ।

प्रतियोगिता शीर्ष तीन टोलीलाई साबित्री कन्चनजंगा अगरबत्ती उद्योगका प्रोप्राईटर मनिस मुन्द्रा, पर्वत जिल्ला प्रशासन कार्यलयका प्रमुख राजेश पन्थी, नेपाल भलिबल संघका उपाध्यक्ष यमवहादुर गुरुङ, आयोजक रेडियो दिदिबहिनीकी अध्यक्ष कल्पना चापागाईलगायतले पुरस्कृत गरे । नारी दिवसको अवसर पारेर फागुन २२ देखि सञ्चालन भएको तीनदिने प्रतियोगितामा ६ टिमको सहभागिता थियो ।