काठमाडौं (हाम्रो खेलकुद)– इन्डोनेसियामा हुने १८ औं एसियाली खेलकुदका लागि नेपालले अर्को महिनाबाट विशेष तयारी सुरु गर्ने भएको छ । राष्ट्रिय खेलकुद परिषद् (राखेप) का सदस्य सचिव केशवकुमार विष्टले बैशाखबाट विशेष प्रशिक्षण सुरु हुने जानकारी दिए ।

राखेपअन्तर्गत राष्ट्रिय टिम तयारीको आयोजनामा आइतबार सातदोबाटोमा सुरु एनएससी हाइ लेभल स्पोट्र्स साइन्स एन्ड प्लानिङ सेमिनारको उद्घाटनका क्रममा विष्टले प्रशिक्षणको जानकारी दिएका हुन् ।

‘एसियन गेम्सकै लागि विभिन्न खेलको प्रशिक्षण अहिले पनि भैरहेको छ । यो प्रशिक्षण चैतसम्म चल्नेछ । त्यसपछि एसियाली खेलकुदलाई मध्यनजर गरी बैशाखदेखि विशेष बन्द प्रशिक्षण सुरु गर्नेछौं ’ सदस्यसचिव विष्टले भने, ‘यो तयारी एसियन गेम्सको लागि पर्याप्त हुदैन । त्यसैले हामी वैशाख शुरुदेखि नै विशेष प्रशिक्षण राख्नेछौ ।’

सदस्य–सचिव विष्टले वैज्ञानिक पद्धतिबाट खेलाडीलाई प्रशिक्षण गराउने विधि बारे जानकारी दिने उद्देश्यले प्रशिक्षकका लागि सेमिनार सञ्चालन गरिएको बताए । राष्ट्रिय टिममा रहेका विभिनन १५ खेलका प्रशिक्षकलाई समावेश गरी सेमिनार सञ्चालन गरिएको राष्ट्रिय टिम तयारीका निर्देशक अर्जुन विकले जानकारी गराए । सेमिनारलाई दुई चरणमा विजभाजन गरी सञ्चालन गरिएको छ ।

पहिलो चरणमा मार्सल आर्ट बाहेकका खेल स्क्वास, आर्चरी, भारोत्तोलन, सुटिङ, एथलेटिक्स, टेबलटेनिस, पौडी र ब्याडमिन्टनका ३१ प्रशिक्षक सहभागी छन् । पहिलो चरण चैत ८ गतेसम्म चल्नेछ । दोश्रो चरणको सेमिनार चैत १२ देखि १६ गतेसम्म सञ्चलन हुनेछ । त्यसमा तेक्वान्दो, कराते, जुडो, कुस्ती, बक्सिङ र उसुका ३७ प्रशिक्षक सहभागी हुनेछन् । सेमिनारका कोर्ष डाइरेक्टर सुशीलनरसिंह राणा र डा, ज्ञानेन्द्र शाहले सेमिनार सञ्चालन गर्नेछन् ।

स्पोर्टस साइन्स ल्याब सञ्चालनमा
काठमाडौं –राखेपले पहिलो पटक स्पोर्टस साइन्स ल्याब सञ्चालनमा ल्याएको छ । राखेपका सदस्य–सचिव केशवकुमार विष्टले आइतबार ल्याबको उद्घाटन गरे । खेलाडीको धैर्यता, गति र तागत बढाउनुका साथै खेलाडीको फिटनेस स्तरलाई अभिबृद्धि गर्ने उद्देश्यले ल्याब सञ्चालनमा ल्याइएको राखेपअन्तर्गत नेपाल खेलकुद विज्ञान प्रतिष्ठान (सान) का निर्देशक नवीन उप्रेतीले जानकारी गराए ।

उप्रेतीले आगामी दिन ल्याबलाई अझ आधुनिकरण गर्दै विस्तार गर्ने योजना रहेको बताउदै तत्काललाई राष्ट्रिय टिममा रहेका १५ खेलका खेलाडीले ल्याबको सुविधा उपयोग गर्न पाउने जानकारी दिए । सातदोबाटोस्थित अन्तर्राष्ट्रिय खेलकुद परिसरमा रहेको ल्याब करिब २५ लाखको लागतमा सञ्चालनमा ल्याइएको हो ।