काठमाडौं (हाम्रो खेलकुद)- राष्ट्रिय खेलकुद परिषद (राखेप)को आयोजनामा रोल्पामा सर्वाधिक पुरस्कार राशीको सभामुख कप राष्ट्रिय पुरुष तथा महिला भलिबल प्रतियोगिता हुने भएको छ ।

आयोजक राखेपले बिहिबार पत्रकार सम्मलेनको आयोजना गर्दै सर्वाधिक पुरस्कार राशिको सभामुख कप राष्ट्रिय पुरुष तथा महिला भलिबल प्रतियोगिता रोल्पाको सदरमुकाम लिवाङमा बैशाख २९ गतेबाट जेठ २ गतेसम्म हुने जानकारी गराएको हो ।

प्रतियोगितामा सात प्रदेश र तीन विभागीय टिमको सहभागिता रहने राखेपका सदस्यसचिव केशव कुमार विष्टले जानकारी गराए । लिगकम नकआउटको आधारमा हुने प्रतियोगिताको महिला तथा पुरुष दुवैतर्फका विजेता ३ लाख ५० हजार रुपैयाँ पुरस्कार पाउनेछन् । उपविजेताले २–२ लाख तथा तेस्रो हुनेले १–१ लाख पुरस्कार पाउने राखेपले जनाएको छ ।

प्रतियोगिताका लागि प्रदेशस्तरीय टिम छनोट गरिएको राखेप सदस्यसचिव केशवकुमार विष्टल बताए । उनका अनुसार क्षेत्रीय खेलकुद बिकास समिति भएका प्रदेशहरुमा त्यही समिति मातहत र नभएका प्रदेश ३ र ६ मा राखेप बोर्ड सदस्यको नेतृत्वमा गठित उच्चस्तरीय समितिको रहोबरमा टिम छनोट गरिएको छ ।

५५ लाख बजेट रहेको प्रतियोगिता सभामुख कृष्णबहादुर महराको राजनैतिक उद्गमस्थल पनि भएकाले रोल्पामै प्रतियेगिता गर्न लागिएको सदस्यसचिव विष्टले बताए । प्रतियोगिताको सभामुख महराले उद्घाटन गर्ने कार्यक्रम तय भएको छ ।