अर्जुन कार्की
बागलुङ – गत बर्ष बागलुङ खेलकुदमा चलायमान रह्यो । साना ठूला प्रतियोगिता आयोजना बर्षभर भए । मुख्यत भलिबल, फुटबल र क्रिकेटका ठूला प्रतियोगिताले जिल्लामा खेलप्रतिको आकर्षण पनि बढ्यो ।

बागलुङ उद्योग वाणिज्य संघले खुल्ला राष्ट्रिय भलिबल प्रतियोगिता, बागलुङ नगरपालिकाले माघमा प्रदेश नम्बर ४ स्तरिय प्रथम मेयर कप फुटबल प्रतियोगिता तथा बागलुङ क्रिकेट क्लवको आयोजना र फ्युचर ब्राईटर स्पोर्टस् क्लब र चैत्राष्टमी मेला मुल आयोजक २०७४ को सहआयोजनामा पाँचौ धौलागिरी कप तथा चैत्राष्टमी टि ट्वान्टी क्रिकेट प्रतियोगिता आयोजना गरे । जसमा राष्ट्रिय स्तरका खेलाडीको सहभागिताले प्रतियोगिताको रौचक थप बढायो ।

तर, जुन जोस र उत्साहका साथ प्रतियोगिताको घोषणा, सञ्चालन गरिन्छ त्यसपछि हिसाब सार्वजनिक गर्ने मामलामा भने आयोजकहरु उदासिन देखिन्छन् । आयोजक समितिका कपिय सदस्य नै आयव्ययमा अनभिज्ञ रहने गरेका छन् । मेयर कप फुटबल प्रतियोगितामा १६ लाख ५७ हजार ३ सय रुपैयाँ खर्च भएको बताइएपनि राष्ट्रिय भलिबल प्रतियोगिता र धौलागिरी कप क्रिकेट प्रतियोगिताको हिसाब अहिले सम्म बाहिर ल्याएको छैन ।

जिल्ला खेलकुद विकास समितिका अध्यक्ष धन बहादुर परियारले हिसाब सार्वजनिक हिसाब किताब सार्वजनिक नहुँदा स्थानियस्तरबाट सहयोग जुट्न गाह्रो हुने बताउँछन् ।  उनी भन्छन्, ‘आयव्यय सार्वजनिक गर्ने चलन छैन । पटक–पटक प्रतियोगिता संचालन गर्दा सहयोग संकलन गर्न आयोजकलाई गाह्रो हुने गरेको छ ।’

 

मेयरकप फुटबलको आयव्यय त्रैमासिक आर्थिक प्रतिवेदनमै कार्यालयबाट सार्वजनिक गरिएको नगरप्रमुख जनकराज पौडेल बताउँछन् । त्रैमसिक सूचना प्रकाशित गरि सार्वजनिक गर्ने गरेको बताउँदै पौडेल पत्रकार सम्मेलनमार्फत नै सार्वजनिक गर्नुपर्ने नलागेको बताउँछन् । मेयर कप सञ्चालनको जिम्मेवारी पाएको जिल्ला खेलकुदका अध्यक्ष परियारले खर्चको हिसाब नगपालिकालाई बुझाएर भुक्तानी समते लिइसकेको जानकारी दिए ।

धौलागिरी कप तथा चैत्राष्टमी टि ट्वान्टी क्रिकेट प्रतियोगिताको हिसाब गर्न अझै बाँकी रहेकोले आयव्यय सार्वजनिक गर्न नसकेको प्रतियोगिता संयोजक दिपेन्द्र खड्का बताउँछन् । ‘आर्थिक समितिले हिसाब दिएको छैन । त्यसका सदस्यहरु जिल्ला बाहिर भएकाले बैंठक बस्न सकेको छैन, ‘खड्काले भने, ‘अरु हिसाब पनि अलि अलि बाँकी छ । त्यसले आम्दानी खर्च सार्वजनिक गर्न सकिएको छैन । तर, हामी छिट्टै सार्वजनिक गछौं ।’

पुसमा बागलुङ महोत्सवमा संचालित पुरुष तथा महिला भलिबलको पनि हिसाब सार्वजनिक गरिएको छैन । जिल्लामा हुने अन्य स्कुल स्तरिय र स्थानिय प्रतियोगिता हिसाब सावर्जनिक गर्ने चलन छैन । स्थानिय निकाय र जनताको सहयोगमा हुने प्रतियोगिताका हिसाब सार्वजनिक नगर्दा आयोजकप्रति विश्वास घट्दै जाने खतरा रहन्छ । जसले विस्तारै गति लिन थालेको जिल्लाको खेलकुद गतिविधिमा असर पर्ने देखिन्छ ।