धनगढी (हाम्रो खेलकुद)- एसटिएस टेलिभिजनले धनगढीमा भएको नेपाल आईस मिडिया कप फुटसल प्रतियोगिताको उपाधि जितेको छ । फ्ल्याटल्याण्ड फुटसलमा बुधवार भएको फाइनल खेलमा पश्चिम टुडेलाई १४–४ को फराकिलो गोल अनतरले पराजित गर्दै एसटिएसले उपाधि जितेको हो ।

सटिएसका लागि शंकर बोहराले ७, सागर शाहले ५ र जितेन्द्र रावलले २ गोल गरे । पश्चिम टुडेका लागि दिपक उपाध्याय र रोशन चौधरीले समान २ गोल गरे । उपाधिसँगै एसटिएसले नगद १५ हजारसँगै ट्रफी पायो । पश्चिम टुडेले नगद ७ हजार सहित ट्रफी हात पार्यो ।

पश्चिम टुडेका दीपक उपाध्याय प्रतियोगिताको उत्कृष्ट खेलाडी चुनिए । पश्चिमकै आभाष उपाध्याय उत्कृष्ट गोलरक्षक र सागर साह सर्वाधिक गोलकर्ता एसटिएसका भए । दिनेश एफएमले फेयर प्ले अवार्ड जित्यो । जेठ ४ गतेदेखि सुरु भएको प्रतियोगितामा ९ टोलीको सहभागिता रहेको थियो ।

विजयी खेलाडीलाई प्रदेशसभा सदस्य हर्क कुँवर, आयोजक नेपाल खेलकुद पत्रकार मञ्च जिल्ला समन्वय शाखा कैलालीका अध्यक्ष सीताराम ओझा, कैलाली जिल्ला खेलकुद विकास समितिका बरिष्ठ उपाध्यक्ष बाबुराजा श्रेष्ठ, नेपाल पत्रकार महासंघका केन्द्रिय सदस्य मिन बम, नेपाल पत्रकार महासंघ सुदूरपश्चिम प्रदेशका अध्यक्ष अर्जुन शाह लगायतले पुरस्कृत गरे । प्रतियोगितालाई चौधरी गुप्रको सिजी ब्रुअरीको उत्पादन नेपाल आईसले मुख्य प्रायोजन गरेको थियो ।