काठमाडौं (हाम्रो खेलकुद) – रमेश सिलवाल राष्ट्रिय खेलकुद परिषद् (राखेप) नयाँ सदस्य सचिव नियुक्त भएका छन् । नेपाल भलिबल संघको सिफारिसमा राखेपको बोर्ड सदस्य नियुक्ती भएको लगत्तै उनलाई सोमबार युवा तथा खेलकुद मन्त्री जगत विश्वकर्माले ४ वर्षका लागि सदस्य सचिव नियुक्त गरेका छन् ।

• 

मन्त्रीस्तरीय निर्णयपछि मन्त्री विश्वकर्माबाट आज सिंहदरबारस्थित युवा तथा खेलकुद मन्त्रालयमा सिलवालले सपथ लिएका छन् । सिलवालले आजै पदभार ग्रहण गर्ने बताइएको छ । आइतबार मात्र भलिबल संघको कार्यसम्पादन समितिको बैठकले सिलवाललाई राखेप बोर्ड सदस्य नियुक्त गर्न मन्त्रीलाई सिफारिस गरेको थियो । निवर्तमान सदस्य सचिव केशवकुमार विष्टको असार ९ गते ४ वर्षे कार्यकाल सकिएको थियो ।

• 

त्यसपछि रिक्त रहेको सदस्य सचिवमा सिलवाललाई नियुक्त गरेको हो । राखेप सदस्यहरु मध्येबाट मन्त्रीस्तरीय निर्णयबाट ४ वर्षका लागि राखेप सदस्य सचिव नियुक्त गर्ने प्रावधान छ ।

निर्वतमान सदस्य सचिव विष्ट र सदस्य राजेन्द्र श्रेष्ठको पदावधि हालै टुंगिएको थियो । राष्ट्रिय संघहरुको सिफारिसमा ३ सदस्य राखेप बोर्डमा सदस्य नियुक्त हुने प्रावधान छ । संघको सिफारिसमा रहेका दावा गुरुङ राखेप सदस्य छन् ।

• 

प्रधानमन्त्री संरक्षक रहने राखेपमा युवा तथा खेलकुद मन्त्री अध्यक्ष छन् । प्रधानमन्त्रीको निकट मानिने सिलवाल पूर्व सदस्य सचिव विष्टले पूर्नगठन गरेको नेपाल क्रिकेट संघ (क्यान) अध्यक्ष हुन् ।
हिसान र गोल्डेन गेट कलेजका अध्यक्ष समेत रहेको सिलवाल मदन भण्डारी स्पोर्टस एकेडेमीका संस्थापक अध्यक्ष हुन् । उनी क्यानको उपाध्यक्ष समेत रहिसकेका छन् ।

• 

प्रधानमन्त्री केपी ओली, उप प्रधानमन्त्री इश्वर पोखरेल र युवा तथा खेलकुद मन्त्री विश्वकर्माको सहमतिमा पनि सिलवाललाई सदस्य सचिव बनेका हुन् ।