काठमाडौं (हाम्रो खेलकुद)- नेपाल भलिबल संघका सल्लाहकार तथा पूर्व महासचिव जय नारायण चौधरीले भलिबलका विभिन्न खेल सामग्री नेपाल भलिबल संघलाई सहयोग गरेका छन् ।

पूर्व महासचिव चौधरीले जापानिज सिन्हो कम्पनीबाट करिव ११ लाख रुपैया बराबरको भलिबल खेल सामग्री खरिद गरी पठाएको सामग्री मंगलबार प्राप्त गरेको संघका महासचिव जितेन्द्र बहादुर चन्दले हाम्रो खेलकुदलाई जानकारी गराए ।

सहयोग आएको सामग्रीमा एफआइभीभीबाट मान्यता प्राप्त १ सेट पोल, १ थान नेट, १ जोडी एन्टेना र १ सेट पोस्ट कभर रहेका छन् । जसको नेपाली मुल्य करिव ११ लाख रुपैया हुन आउने महासचिव चन्दले बताए । उनले यो सामग्रीहरु आसन्न एभीसी सेन्ट्रल जोन पुरुष भलिबल च्याम्पियनसिपको लागि व्यक्तिगत रुपमा सहयोग गरेको हुन् ।

संघका महासचिव चन्दले यो खेल सामग्रीहरु आसन्न एभीसी सेन्ट्रल जोन भलिबल च्याम्पियनसिपमा र ठुला अन्तर्राष्ट्रिय प्रतियोगिताहरुमा प्रयोग गरिने जानकारी गराए । एभीसी सेन्ट्रल जोन भलिबल च्याम्पियनसिप ३२ साउनबाट ८ भदौसम्म काठमाडौंमा आयोजना हुदैछ । च्याम्पियसिपमा ७ राष्ट्रको सहभागिता रहनेछ ।

हङकङमा बसोबास गर्दै आएका पूर्व अन्तर्राष्ट्रिय खेलाडी चौधरीले यसअघि पनि भलिबल विकासका लागि पटक पटक सहयोग गरेका छन् । आफ्नो समयमा क्विक स्पिाइकरको रुपमा चर्चा कमाएका चौधरीले भलिबलमा पु¥याएको योगदानको मुल्याङ्न गर्दै नेपाल एपिएफ क्लबले दुई वर्षअघि सम्मान गरेको थियो ।