काठमाडौं (हाम्रो खेलकुद) – एक्टिभ स्पोर्टस् कम्प्लेक्सको आयोजनामा शनिबार भएको पहिलो स्कोडा अन्तर बैंक फुटसल प्रतियोगिताको पहिलो दिन समूह ‘ए’बाट कुमारी बैक विजेता र ग्लोबल आइएमइ बैंक उपविजेताका रुपमा अन्तिम आठमा पुगेका छन् ।

एनआइसी एसिया बैंक विजेता र मेगा बैंक उपविजेताका रुपमा समूह ‘बी’बाट तथा सिभिल बैंक विजेता र प्रभु बैंक उपविजेताका रुपमा समूह ‘सी’बाट रुपमा क्वार्टरफाइनलमा पुगेका छन् । त्यस्तै समूह ‘डी’बाट हिमायन बैंक विजेता र एनएमबी बैंक उपविजेताका रुपमा अन्तिम आठमा पुगेका छन् ।

अब सेमिफाइनल प्रवेशका लागि साउन १८ गते कुमारी र मेगा तथा एनआइसी एसिया र ग्लोबल आइएमइबीच प्रतिस्पर्धा हुनेछ । त्यस्तै सिभिल र एनएमबी तथा हिमालयन र प्रभुबीच अन्तिम आठमा प्रतिस्पर्धा हुनेछ । सहभागी २० बैंक मध्ये पहिलो दिन समूह चरणका खेलबा ८ टोली अघिल्लो चरणमा प्रवेश गर्दा बाँकी टोली समूह चरणबाटै बाहिरिएका छन् ।

साउन १८ हुने फाइनलको विजेताले उपाधि १ लाख, दोस्रो हुने टोलीले ५० हजार रुपैयाँ प्राप्त गर्नेछन् । प्रतियोगिताका उत्कृष्ट खेलाडी र उच्च गोलकर्ताले कम्लेम्समा रहेको स्विमिङ पुलमा एक वर्ष सम्म निशुल्क पौडी खेल्न पाउनेछन् । मोरङ अटो वर्कसपको प्रायोजना रहेको प्रतियोगिताको उद्घाटन राष्ट्रिय फुटबल टोलीका गोलकिपर किरण चेम्जोङले गरेका थिए ।