काठमाडौं (हाम्रो खेलकुद)– थाइल्यान्डकी पोर्नतिप बुरानाप्रसेर्तुक र दक्षिण कोरियाकी गा युन पार्क योनेक्स सनराइज नेपाल अन्तर्राष्ट्रिय च्यालेञ्ज ब्याडमिन्टनको महिला एकल उपाधिका लागि भिड्ने भएका छन् ।

दशरथ रंगशालास्थित कर्भड हलमा शनिबार भएको सेमिफाइनलमा पोर्नतिपले जापानकी रिको गुन्जीलाई २१–१७, २१–१५ लाई कोरियाकी गा युन जापानकै अकारी नाकाशिजुलाई २१–१८, २१–१९ ले हराउँदै फाइनल भेट पक्का गरेका हुन् ।

पुरुष एकलतर्फको उपाधिका लागि भियतनामका काव सुओङ र अदुलराच नामकुल उपाधिका लागि भिड्ने भएका छन् । समिफाइनलमा छैटौं वरियताका कावले सातौं वरियताका भारतका सिरिल बर्मालाई २१–११, २१–१६ ले र आठौं वरियताका अदुलराचले पाँचौ वरियताका झिआउदोङ सेङलाई २१–१४, २१–१९ ले हराउँदै अन्तिम भेट पक्का गरेका हुन् ।

महिला युगल तर्फ अष्ट्रेलियाका सेताना मापासा र ग्रोन्या सोमरभिल्ले तथा भारतका मनिषा के. र रुतापर्ना पान्डाको जोडी फाइनलमा पुगेको छ । प्रतियोगिताको शीर्ष वरियताका सेताना र ग्रोन्याको जोडीले थाइल्याण्डका रुईथाईचानोक लैसुवान र सुपामार्त मिङ्गचुवाको जोडीलाई १८–२१, २१–१६, २१–१३ ले हरायो । चौथो वरियताका मनिषा र रुतापर्नाको जोडीले थाइल्याण्डकै चासिनी कोरेपाप र क्वान्छानोक सुजाईप्प्रापरतको जोडीलाई १७–२१, २३–२१, २१–१७ ले पराजित गर्दै अन्तिम दुईको यात्रा तय गरेको हो ।

पुरुष युगल तर्फ भने भारतका खेलाडीबीच फाइनल प्रतिस्पर्धा हुने भएको छ । पहिलो सेमिफाइनलमा अत्री मनु र रेड्डी बि. सुमिथ को जोडीले कोरियाका किम दोक्योङ र किम सा राङ लाई १८–२१, २१–१९, २१–१९ ले हरायो । एम. आर. अर्जून र ध्रुव कपिलाको जोडीले कोरियाका ना सुङ सिउङ र वाङ चानको जोडीलाई २१–१६, २१–१६ ले पराजित गर्दै फाइनलको यात्रा तय गरयो ।

मिक्स युगल तर्फ थाइल्याण्डका सुर्पाक जोमखो र सुपिसारा पाउसाम्प्रानको जोडी र कोरियाका किम सा राङ र किम हा नाको जोडी फाइनल पुगेको छ । थाइल्यान्डको जोडीले कोरियाका ना सुङ सिउङ र किम मिन जीको जोडीलाई २५–२३, २१–१० ले र कोरियाको जोडीले भारतका रेड्डी बि. सुमिथ र कुहो गार्गको जोडीलाई १५–२१, २२–२०, २१–१७ ले पराजित गर्यो । २५ हजार अमेरिकी डलर पुरस्कार रहेको च्याम्पियनसिपको सबै विद्याका फाइनल आइतबार हुनेछ ।