वीरगन्ज (हाम्रो खेलकुद)– एकताका लागि दौड भन्ने नाराका साथ वीरगन्ज म्याराथन शनिबार आयोजना हुँदैछ ।
नेपाली सेना मध्य प्रितना र २८ बाहिनी, वीरगन्ज महानगरपालिका र भ्रमण वर्ष २०२० को प्रदेश २ को कार्यालयको संयुक्त आयोजनामा हुँदै म्याराथनमा झन्डै ५ हजार दौडने आशा गरिएको छ ।
वीरगन्जमा पहिलो पटक आयोजना हुन लागेको म्याराथनलाई टिभिएसले मुख्य प्रायोजन गरेको छ । स्वच्छ देश स्वस्थ मधेश सन्देशसहित सेना दिवसको उपलक्ष्यलाई समेत पारेर म्यानराथन आयोजना गरिएको बताइएको छ । सेनाले काठमाडौंमा पनि फागुन ३ गते म्याराथन आयोजना गरेको थियो ।
वीरगन्ज म्याराथनमा १४ इभेन्ट समावेश गरिएको र ४५ पदकका लागि प्रतिस्पर्धा हुने बताइएको छ । जसमा महिला/पुरुष फुल म्यराथन (४२.१९५ किमी), हाफ म्याराथन (२१ किमी), १० किमी, ५ किमी छात्राछात्रा दौड, ४० वर्ष माथि गैर सैनिक र भूपूर्वक सैनि, ५ किमि हेरिटेज वाक, १ किमी जेष्ठ नागरिक दौड र १ किमी ह्विलचियर दौड समावेश गरिएको छ ।
महिला /पुरुष दुवैतर्फको विजेताले समान पुरस्कार पाउने बताइएको छ । म्यराथनको विजेताले टिभिएसको स्कुटर र १ लाख २५ हजार रुपैयाँ प्राप्त गर्नेछन् । त्यस्तै दोस्रो हुनले १ लाख ५० हजार र तेस्रो हुनेले १ लाख रुपैयाँ प्राप्त हात पार्नेछन् ।
त्यस्तै हाफ म्यराथनको विजेताले ७५ हजार रुपैयाँ पाउने बताइएको छ । विभागिय टोली खेलाडीले हाफ म्याराथन जितेमा गैर विभागिय खेलाडीतर्फबाट पनि विजेता बन्नेलाई पनि समान पुरस्कार दिइने बताइएको छ ।
खेलकुद र सामाजिक सद्भाव जोडिएको वीरगन्ज म्याराथनको मुख्य प्रायोजक हुन पाउँदा खुसी लागेको उल्लेख गर्दै टिभिएसको अधिकारिक विक्रेता जगदम्बा मोर्टस्का मार्केटिङ म्यानेजर नवराज कोइरालाले भने,‘ भविष्यमा पनि हामी यस्ता र अन्य खेलकुदका कार्यक्रममा पनि निरन्तर जोडिने छौं ।’
म्याराथनका विजेतालाई प्रदेश २ का मुख्य मन्त्री लालबाबु राउत, नेपाली सेनाका प्रधानसेनापति पूर्णचन्द्र थापा र अन्य अतिथिले पुरस्कृत गर्ने कार्यक्रम रहेको बताइएको छ ।
