दिपक न्यौपाने, बुटवल

डढ दशक अघि स्थापाना भएको बुटवल ब्याडमिन्टन क्लबले खेलकुदका साथै सामाजिक कामलाई पनि निरन्तरता दिदै आएको छ । क्लबले विश्वव्यापी रुपमा कोरोना भाइरस कोभिड १९ महामारीको रुप लिइरहेका बेला त्यो संक्रमणबाट जोगिनका लागि बुटवल उप महानगरपालिकाले खडा गरेको प्रकोप व्यवस्थापन कोषमा आर्थिक सहयोग गरेको छ ।

खेलाडी र पदाधिकारीहरुबा संकलन भएको २ लाख १७ हजार ८ सय ७१ रुपैयाँ क्लबले कोषलाई हस्तान्तरण गरेको छ । माँझगाँउस्थित बुटवल ब्याडमिन्टन क्लबको कर्भड हलमा आयोजित कार्यक्रममा बुटवल उप महानगरपालिकाका मेयर शिवराज सुवेदी तथा वडा नम्बर ११ का वडाअध्यक्ष रामचन्द्र क्षेत्रीलाइ हस्तान्तरण गरिएको क्लबका सचिव शम्भु भट्टराईले जानकारी दिए ।

क्लबले चलाएको अभियानमा क्लबमा आबद्ध खेलाडीमध्येका ६० जनाले आर्थिक सहयोग गरेका थिए । विश्व स्वास्थ संगठनले नेपाललाई पनि कोरोनाको उच्च जोखिम भएको देशका रुपमा राखेकोले सरकारले चैत ११ गते देखि लकडाउन गर्दै आएको छ । लकडाउनका कारण स्थानिय स्तरमा विपन्न वर्गलाई पर्ने मर्कामा परेकाले उनीहरुलाई सहयोग गर्न प्रकोप व्यवस्थापन कोषहरु खडा गरिएका छन् ।

उपमहानगरपालिकाका मेयर सुवेदीले खेलकुदको विकाससगै सामाजिक काममा पनि सत्रिय भएकोमा क्लब र त्यसका खेलाडीको प्रशंसा गरे । उनले विश्व नै विषम परिस्थितिबाट गुज्रिरहेकोले सबैले आ आफ्नो ठाँउबाट सकारारत्मक भूमिका निर्वाह गर्नुपर्नेमा जोड दिए । वडा अध्यक्ष क्षेत्रीले संस्थागत रुपमा वडामा ठुलो सहयोग आएको बताए ।

बुटवल ब्याडमिन्टन क्लबका अध्यक्ष रमेश बहादुर थापाको अध्यक्षतामा भएको कार्यक्रममा उपाध्यक्ष पंकज ज्ञवाली, कोषाध्यक्ष दलबहादुर खत्री, राजेन्द्र ढकाल, सुरज खत्री, भानु खत्रि, नारायण प्रसाद घिमिरे, अर्जुन कार्की, शेरबहादुर भण्डारी, आयुषजग कार्कीको उपस्थिति थियो ।