काठमाडौं (हाम्रो खेलकुद)– नेपाल पारा तेक्वान्दो समितिले काठमाडौं उपत्यकामा रहेको आफ्ना खेलाडीलाई आर्थिक र खाद्यान्न सहयोग गरेको छ । कोरोना भाइरस कोभिड १९ को संक्रमणका कारण सरकारले २ महिना भन्दा लामो समयदेखि लकडाउन गरेपछि आफ्नो खेलाडीलाई कठिनाइ भएपनि समितिले उनीहरुलाई सहयोग गरेको हो ।

उपत्यकाका विभिन्न स्थानमा रहेका आफ्ना ७ खेलाडीलाई उनीहरु बसेको ठाँउ पुगेर आइतबार खाद्यन्न र आर्थिक सहयोग प्रदान गरिएको समितिका सदस्य दीपक विष्टले जानकारी दिए । सहयोग पाउने पारा तेक्वान्दो खेलाडीमा दिशेप महत, रञ्जना धामी, राम अधिकारी, पलेसा गोबद्र्धन, सृजना तामाङ, सिता भण्डारी र लोकराज शाही छन् ।

समितिका सदस्य रोसिद उन्निथान, सदस्य हेमन्त भट्टराई, ओलम्पियन दीपक विष्ट, काठमाडौं जिल्ला तेक्वान्दो संघका सचिव कुमार लामाले खेलाडीलाई खाद्य सामाग्री र आर्थिक सहयोग हस्तान्तरण गरेका थिए । खेलाडीका लागि उन्निथनले खाद्य र नगद तथा मेन्टर इन्स्टच्युट प्रालीका प्रबन्ध निर्देशक समेत रहेका भट्टराईले नगद सहयोग गरेका थिए ।

भट्टराईले पाराका खेलाडीलाई प्रायोजन गर्दै आएका छन् । नेपाल तेक्वान्दो संघ अन्र्तगत रहेको पारा समितिको अध्यक्ष कसिम मियाँ रहेका छन् । अध्यक्ष मियाँले खेलाडी समितिकै परिवार भएकाले उनीहरुलाई अप्ठ्यारो पर्दा समिति सधै साथमा रहने बताएका छन् ।