काठमाडौं (हाम्रो खेलकुद)– राष्ट्रिय ब्याडमिन्टन खेलाडी दीपेश धामीलाई मातृशोक र नेपाल भलिबल संघका उपाध्यक्ष हरकसिंह धामीलाई पत्नीशोक परेको छ । राष्ट्रिय ब्याडमिन्टन च्याम्पियन दीपेशकी आमा झुपादेवी धामीको ५० वर्षेको उमेरमा बुधबार बिहान निधन भएको हो ।

धनगढीस्थित माया मेट्रो अस्पतालमा उपचारका क्रममा बिहान ७ः४५ मा मृत्यु भएको पति हरकसिंह धामीले जानकारी दिए । उनी मिर्गौला रोगबाट पीडित थिइन् । कोरोना भाइरस कोभिड १९ का कारण चैत ११ देखि लकडाउन भएका कारण मिर्गौला प्रत्यारोपण हुन नसकेको धामीले बताए ।

त्यसबीचमा असारमा टाउकोमा समस्या आएपछि टिचिङ अस्पतालमा शल्यक्रिया गरिएको थियो । शल्यक्रियापछि उनलाई महेन्द्रनगर भिमदत्त नगरपालिका ६ स्थित घर लगिएको थियो । १३ औं दक्षिण एसियाली खेलकुद (साग) का कास्य पदक विजेता दीपेशले नै आमाको हेरचाह गर्दै आएका थिए ।

शल्यक्रिया सफल भएपनि त्यसपछिको दिनहरु भने कठिन भएको पिता धामीले बताए । कतिपय अवस्था उनी अचेत पनि हुने गरेकी थिइन् । मंगलबार राती पुनः समस्या भएपछि उपचारका लागि धनगढी लगिएको धामीले जानकारी दिए ।

दीपेशका पिता धामी भिमदत्त ६ का वडाध्यक्ष हुन् । बुधबार नै महाकालीको झुगेलाघाटमा अन्तिम संस्कार गरिने धामीले जानकारी दिए । धामी दम्पतीका २ छोरा र १ छोरी छन् ।