काठमाडौं (हाम्रो खेलकुद) – नेकपाको भातृसंगठन नेपाल खेलकुद महासंघ अन्तरगतको राष्ट्रिय ब्याडमिन्टन संघ नेपाल र गोलबजार नगरपालिका, लाहानको संयुक्त आयोजनामा अर्को साता सुरु हुने १० औं संस्करणको योनेक्स सनराईज पुष्पलाल स्मृती ¥याकिङ ब्याडमिन्टन प्रतियोगिताको सबै तयारी पूरा भएको जनाइएको छ ।

प्रतियोगिता पुस २९ गते देखि माघ ३ गते सम्म गोलबजार, लाहानमा हुँदैछ । प्रतियोगितालाई नेपाल ब्याडमिन्टन संघ र गोलबजार ब्याडमिन्टन संघले सहयोग गर्ने छन् । एक मात्र राष्ट्रिय ¥याकिङ ब्याडमिन्टन प्रतियोगिता ब्याडमिन्टन खेलको विकास र विस्तार गर्ने उद्धेश्यले उपत्यका बाहिर आयोजना गर्दै जाने लक्ष्य रहेको संघका अध्यक्ष वीरेन्द्र श्रेष्ठले बताए । उनले गोलबजार ब्याडमिन्टन क्लबको सहयोगमा गोलबजार नगरपालिकाले खेलाडीको आवास, खाना र प्रतियोगिताको व्यवस्था गर्ने बताए ।

प्रतियोगितामा पुरुष एकलमा शीर्ष १६ स्थान तथा महिलातर्फ एकल शीर्ष १२ स्थानका खेलाडीले भाग लिनेछन् । पुरुषको शीर्ष १६ र महिला शीर्ष १२ बाहेकका एकल, पुरुष तथा महिला युगल, छात्र तथा छात्रा यू – १७ एकल र ४५ बर्ष माथिको भेट्रान्स युगल गरि १० विधामा प्रतिपर्धा हुने बताइएको छ ।

प्रतियोगितामा नेपाल ब्याडमिन्टन संघसंग आबद्ध ४७ जिल्ला, तीन विभागिय टोली नेपाली सेना त्रिभुवन आर्मी क्लब, नेपाल पुलिस क्लब र सशस्त्र प्रहरी बलको एपिएफ क्लब गरि झन्डै २ सय खेलाडीको सहभागिता रहनेछ ।

प्रतियोगिताको वरियता प्रतिस्पर्धामा सहभागी खेलाडीले सहभागिता भएबापत १ हजार ५ सय रुपैयाँ प्राप्त गर्नेछन् । त्यस्तै पहिलो चरण लिगमा विजयी हुने खेलाडीहरुले प्रत्येक खेल वापत थप १ हजार ५ सय रुपैयाँ पाउनेछन् ।

क्वाटरफाईनमा विजयी खेलाडीहरुले ८ हजार र सेमिफाइनलमा विजयी खेलाडीले १६ हजार रुपैयाँ प्राप्त गर्ने छन् । विजयी खेलाडीले थप २० हजार र उपविजेता खेलाडीहरुले थप ५ हजार रुपैयाँ प्राप्त गर्नेछन् ।

त्यस्तै अन्य विधामा वरियतावाहेक प्रतियोगितामा पुरुष तथा महिला एकल र युगल, यस्तै ४५ बर्ष माथिको भेट्रान्स युगलका विजयी खेलाडीले नगद २० हजार, उपविजेताले १० हजार रुपैयाँ र शीर्ष चारमा पुग्नेले समान ५ हजार रुपैयाँ प्राप्त गर्नेछन् ।

त्यस्तै छात्र तथा छात्रा यु – १७ का विजयीले १५ हजार, उपविजेताले नगद ८ हजार र शीर्ष चारमा पुग्न सफल खेलाडीले ४ हजार प्राप्त गर्नेछन् । झन्डै २० लाख रुपैयाँ खर्च हुने प्रतियोगितामा नगद पुरस्कार तर्फ ५ लाख ५८ हजार रुपैयाँ रहेको छ ।

प्रतियोगिताको मुख्य प्रायोजकमा ब्याडमिन्टन खेल सामाग्री उत्पादक तथा वितरक योनेक्स सनराईज रहेको छ । योनेक्सले नेपालमा ब्याडमिन्टन खेलको विकासमा सहयोग पु¥याउने उद्धेश्यले लामो समय देखि विभिन्न प्रतियोगितामा प्रायोजन गर्दै आईरहेको छ । त्यस्तै सह प्रायोजकमा राष्ट्रिय खेलकुद परिषद् रहेको छ ।