काठमाडौं (हाम्रोखेलकुद)-  शिवम सिमेन्टले नेपाली महिला भलिबलको लोकप्रिय टोली न्यू डायमण्ड एकेडेमीलाई एक वर्षको लागि मुख्य प्रायोजन गरेको छ । प्रायोजन सम्झौतामा शिवम् सिमेन्ट लिमिटेडका उपाध्यक्ष सजन देवकोटा र न्यू डायमण्डको तर्फबाट एकेडेमीका अध्यक्ष तथा प्रशिक्षक कुमार राईले हस्ताक्षर गरे ।

सम्झौता अनुसार शिवमले एकेडेमीलाई वार्षिक ८ लाख उपलब्ध गराउने छ भने, न्यू डायमण्डले शिवम् न्यू डायमण्ड भलिबल टिमको नामबाट शिवम सिमेन्टको लोगो अंकित जर्सी लगाएर विभिन्न राष्ट्रिय तथा अन्तर्राष्ट्रिय प्रतियोगितामा सहभागिता जनाउनुपर्नेछ । सम्झौता भएको ८ लाखमध्ये ३ लाख डायमण्डको खेलसामग्री र प्रतियोगिताको लागि ५ लाख रहनेछ । यस्तै सम्झौतामा एकेडेमीले एक राष्ट्रिय प्रतियोगिता आयोजना गर्नुपर्ने र उक्त प्रतियोगितालाई शिवम् सिमेन्टले मुख्य प्रायोजक रहनेछ ।

सम्झौतापछि न्यू डायमण्डका प्रशिक्षक कुमार राईले लामो संघर्षपछि न्यू डायमण्डको इतिहासमा पहिलोपटक ठुलो प्रायोजन गरेकोमा शिवम् सिमेन्टलाई धन्यवाद ज्ञापन गरे ।

‘सम्झौतासँगै खेल्ने क्रम शुरु भैसकेको छ । यो सम्झौताले हामीलाई अझै चुनौती र हौसला बढेको छ ।’ प्रशिक्षक राइले भने, ‘आगमी दिनहरुमा हामीले अहिले प्रदर्शन गरेभन्दा दोब्बर प्रदर्शन गर्ने विश्वास दिलाउन चहान्छौं । मेरा खेलाडी नानीहरुलाई अझ निखारता ल्याउदै भलिबलमा नयाँ आयम थप्ने हाम्रो प्रयास रहनेछ ।’

यस्तै शिवम सिमेन्टका उपाध्यक्ष सजन देवकोटाले नेपालको नम्वर एक सिमेन्ट महिला भलिबलमा नम्वर एक टिमसँग जोडिन पाउनु कम्पनीको लागि गौरवको कुरा रहेको बताए । ‘राष्ट्रिय खेल भलिबल अझैपनि व्यवसायिक हुन सकेको छैन ।’ उपाध्यक्ष देवकोटाले भने, ‘भलिबलमा व्यवसायिकताको लागि नै हामीले डायमण्डको प्रदर्शनको आधारमा डायमण्डलाई रोज्दै व्यवसायिकता ल्याउने प्रयास थालेका हौ ।’ आशा छ भलिबलले विस्तारै व्यवसायिकता लिनेछ । उनले थपे ।

नेपाल भलिबल संघका महासचिव जितेन्द्र बहादर चन्दले संघको तर्फबाट बधाई व्यक्त गरे । न्यू डायमण्ड एकेडेमीकी प्रतिभाशाली खेलाडी प्रतिभा मालीले दुइ साता अघि मात्रै साहस स्पोर्टस्ले १ लाख ७० हजार को प्रायोजन गरेको थियो ।